"Реал" футболчилари мундиалда тарихий рекордга яқин

Килиан Мбаппе Марокаш дарвозасига киритган гол нафақат Франция терма жамоасини жаҳон чемпионати–2026 ярим финалига яқинлаштирди, балки унинг клуби – мадридлик "Реал"ни ҳам тарихий рекорд остонасига олиб чиқди.

Ҳозирча бир жаҳон чемпионати доирасида энг кўп гол урган клублар сифатида уч жамоа қайд этилган: венгриялик "Гонвед" (ЖЧ–1954), германиялик "Бавария" (ЖЧ–2014) ва ПСЖ (ЖЧ–2022). Уларнинг футболчилари ҳар бири ўз вақтида мусобақа давомида 18 тадан гол уришга муваффақ бўлган.

Жорий мундиалда мадридликлар сафида майдонга тушаётган футболчилар ҳозирча 17 та гол муаллифига айланди. Бу кўрсаткич аллақачон тарихий натижа ҳисобланади ва "Реал" футболчилари қолган ўйинларда уни янада яхшилаши кутилмоқда. Шу пайтгача шунча голни фақат "Реймс" жамоаси вакиллари (ЖЧ–1958) қайд этган эди. 16 тадан гол билан эса "Бенфика" (ЖЧ–1966) ва "Барселона" (ЖЧ–1994) футболчилари тарихга кирган.