"Реал"га келган ёш ҳужумчининг маоши саккиз баробарга ошди

«Леванте» таркибидан мадридлик «Реал»га ўтган 21 ёшли ҳужумчи Карлос Эспининг маоши кескин ошди. Sport.es нашри ёзишича, ёш форварднинг йиллик иш ҳақи 420 минг евродан 3,36 миллион евродан ортиқ миқдорга етган. Янги шартнома 2031 йилгача мўлжалланган.

«Реал» Эспининг трансфери ҳақида 30 июль куни расман эълон қилди. Журналист Фабрицио Романо маълумотига кўра, мадридликлар 21 ёшли футболчи учун шартномада кўзда тутилган 25 миллион евролик озод қилиш бадалини тўлаган.

Ўтган мавсумда Эспи барча мусобақалар доирасида 27 ўйинда майдонга тушиб, 13 та гол урди. Унинг «Леванте» билан тузган шартномаси 2027 йил ёзигача амал қилиши керак эди. Transfermarkt портали маълумотларига кўра, ҳужумчининг бозор қиймати ҳозирча 20 миллион евро деб баҳоланмоқда.

Эслатиб ўтамиз, «Реал» Мадрид ўтган асрда эришган ютуқлари туфайли кўплаб мутахассислар томонидан ХХ асрнинг энг яхши клуби сифатида эътироф этилган.