“Реал”: Гвардиола кетди, энди Холандни олсак бўлади

 Мадриднинг “Реал” клуби “Манчестер Сити” ҳужумчиси Эрлинг Холанд атрофидаги вазиятни диққат билан кузатмоқда. Испания клуби Хосеп Гвардиола “шаҳарликлар” бошқарувини тарк этганидан кейин норвегиялик футболчини қўлга киритиш учун ҳаракатларни кучайтириши  кутиляпти.

Бу ҳақда The Sun нашри хабар бермоқда.

Манба маълумотига кўра, “Реал” раҳбарияти дунёнинг энг яхши ҳужумчиларидан бири жамоасини ўзгартириш ҳақида ўйлай бошласа, ҳар қандай имкониятдан фойдаланишга тайёр. Айтилишича, Гвардиоланинг кетиши расман эълон қилинишидан олдин ҳам Холанд жамоадаги ролидан норози бўлган.

Бироқ ҳар қандай эҳтимолий келишув жуда мураккаб бўлади. 2025 йил январь ойида норвегиялик ҳужумчи “Манчестер Сити” билан 2034 йилгача мўлжалланган янги узоқ муддатли шартнома имзолаган эди.

Шунга қарамай, Испаниядаги манбалар мураббий алмашиши футболчининг келажак режаларига жиддий таъсир кўрсатиши мумкин деб ҳисобламоқда. Агар Холанд “Манчестер Сити”ни тарк этишга қарор қилса, “Реал” унга жозибали шартлар таклиф қилишга тайёр.