"Реал" ҳужумчиси жамоани тарк этиши арафасида эди. Бироқ...

"Реал Мадрид" бразилиялик ҳужумчи Эндрикни "Реал Сосьедад"га ижарага бериши мумкин эди.

Журналист Аранча Родригеснинг El Partidazo de COPE эфирида маълум қилишича, бразилиялик форварднинг 2025/26 йилги мавсум учун "Сосьедад"га ижарага берилиши Клублар ўртасидаги Жаҳон чемпионати вақтида келишиб олинган. "Реал"нинг режасига кўра, Эндрик топ-клубда ўсиши ва Ла Лигада ўйин амалиётига эга бўлиши керак эди.

Битим Эндрикнинг сонидан олган жароҳати такрорлангани сабабли амалга ошмади, бунинг натижасида бразилиялик аввалроқ хабар қилинганидек, 8-10 ҳафтага сафдан чиқди. Қайд этилишича, 19 ёшли ҳужумчи ижарага олинишидан бир неча кун олдин жароҳат олган. Футболчи келаси мавсумда ҳам "Реал"да қолиши аниқ.