"Реал Мадрид" ҳужумчиси шу қишдаёқ жамоасини ўзгартириши мумкин

Мадриднинг "Реал" клуби ҳужумчиси Эндрик яқин орада мунтазам ўйин амалиёти учун бошқа жамоага йўл олиши эҳтимолдан холи эмас.

Бразилиялик форвард жорий мавсумда ҳали бирор марта ҳам майдонга тушмаган. 19 ёшли футболчи жароҳатидан соғайган ва “қаймоқранглилар”нинг захирасига киритила бошлаган бўлса-да, бош мураббий Хаби Алонсо унга ҳозирча катта ишонч билдирмаяпти.

Журналист Маттео Мореттонинг маълумотларига кўра, Эндрик жамоадаги вазиятидан қониқмаган — у келаси ёздаги Жаҳон чемпионати олдидан мунтазам ўйнашни хоҳламоқда.

Эҳтимолга кўра, ёш истеъдод январь ойида ижарага жўнаб кетади. Унга Ла Лига, А Серия ва Англия Премьер-лигаси клублари қизиқиш билдирмоқда.