"Реал" мухлислари учун ажойиб хушхабар!

"Пари Сен-Жермен" форварди Килиан Мбаппе француз гранди сафини яна бир йилдан сўнг тарк этишга қарор қилди. Бу ҳақда El Chiringuito TV хабар тарқатмоқда.

Юқоридаги манбага кўра, 21 ёшли тўпурар фаолиятини “Реал”да давом эттирмоқчи. У бу ҳақда ПСЖ раҳбариятини ҳам хабардор қилган.

Бундан аввалроқ эса, Килиан АПЛ клубларидан бирига ўтиши мумкинлиги ҳақида хабарлар тарқалган эди.

Мбаппе ПСЖ сафида 2017 йилдан буён тўп суриб келмоқда. У ўтган давр мобайнида 124 та ўйинда майдонга тушди ва ўз ҳисобига 90 та гол ҳамда 51 та голли узатма ёздириб қўйди. Унинг парижликлар билан амалдаги шартномаси 2022 йилга қадар имзоланган.