"Реал" раҳбарияти футболчилар билан жиддий гаплашиб олмоқчи

"Реал Мадрид" раҳбарияти футболчилар билан уларнинг мақсадлари ва жамоадаги фаолиятини муҳокама қилишга қарор қилди.

"Реал" раҳбарлари айрим футболчилар жамоа учун ишлашни хоҳламаётганини таъкидлаб, бунга барҳам беришга интилмоқда, дея хабар бермоқда "Marca" нашри. Яқин кунларда улар баъзи ўйинчилар билан суҳбатлашиб, уларнинг истаклари, мақсадлари ва ишга бўлган садоқатини аниқламоқчи.

Таъкидланишича, Винисиус Жуниорнинг ҳозирги ҳолати алоҳида ташвиш уйғотмоқда. "Қаймоқранглилар" раҳбарлари унинг фикрларини билишни хоҳламоқда.

Шунингдек, клуб Родриго масаласида якуний қарорга келган ва футболчи учун бошқа вариантларни кўриб чиқмоқда.

Мбаппе ҳам хавотир уйғотмоқда. Хаби Алонсо ўн бир нафар ўйинчининг барчаси майдонда ҳаракат қилиши ва курашиши кераклигини аниқ тушунтирган, бироқ ПСЖга қарши ўйинда бу кузатилмади.

Маълумот учун, кеча мадридликлар клублар ўртасидаги Жаҳон чемпионати ярим финалида ПСЖга 0:4 ҳисобида мағлуб бўлиб, мусобақани тарк этди.