“Реал” тарихида энг буюк футболчи ким бўлгани айтилди

Мадриднинг “Реал” клуби собиқ ҳимоячиси Лукас Васкес жамоа тарихидаги энг буюк футболчи ким эканини айтди. Испаниялик футболчи ўзининг собиқ жамоадоши Криштиану Роналдуни ажратиб кўрсатди.

- Мен Роналдуни “Реал” тарихидаги энг буюк ўйинчи, деб ҳисоблайман, - деди Васкес Diario AS нашрига берган интервьюсида.

Португалиялик ҳужумчи 2009-2018 йиллар давомида “Қироллик клуби” шарафини ҳимоя қилган. Айни пайтда беш карра “Олтин тўп” соҳиби Саудия Арабистонининг “Ан-Наср” клубида тўп сурмоқда.

Лукас Васкес эса, “Реал” тизимида жами қарийб 17 йил фаолият юритган. Жорий йил август ойида 34 ёшли футболчи Германиянинг “Байер” (Леверкузен) клубига ўтди.