"Реал" таркибида 40 ёшгача ёхуд Модрич Мадридда яна бир йил қолишни истайди

Ла Лиганинг 25-турида "Реал" ўз майдонида "Жирона"ни меҳмон қилиб, 2:0 ҳисобида ғалаба қозонди. Ўйиннинг 41-дақиқасида Лука Модрич "пушка"си билан ҳисобни очди. Бу гол трибунадан ўйинни кузатиб турган Жуд Беллингемни ҳам ўрнидан туриб, қарсак чалишига сабаб бўлди. 39 ёшида, нафақат Европада тўп тепаётган, балки дунёнинг энг кучли клубларидан бирида майдонга тушиб, бундай голларни ураётган Модрич яна бир мавсум "қаймоқранглилар" сафида ҳаракат қилишни режалаштирган. 

"Relevo" журналисти Хорхе Пиконнинг сўзларига кўра, Модричнинг яқин-яқингача бу мавсумдан сўнг бошқа клубга ўтиши кутилганди. Аммо у бир неча бор Флорентина Перес билан учрашган ва қолишини айтган. Бунинг учун ярим ҳимоячи маошини камайтиришга ҳам тайёр эканлигини билдирган. Бу эса президентга маъқул келиши мумкин, лекин раҳбариятда ёшларга кўпроқ имкон бериш керак дейдиганлар ҳам йўқ эмас. 

Жамоа ёшларга яна сармоя киритишни бошлаши мумкин. Сабаби, таркибдаги энг ёш ярим ҳиомячи Беллингем (21 ёш). Ундан ташқари 22 ёшли Эдуардо Камавинга ҳам бор. Қолганлари 24 ёшдан баланд. Шу билан бирга, бошқа позициялар билан солиштирилганда жамоада ярим ҳимоячилар сони кам. 

Лука ўтган мавсум сўнггида ҳам жамоани тарк этиши мумкин эди. Унга бир нечта Саудия клубларидан таклифлар бўлган. Аммо у Начо кетганидан кейин "Реал" сардори сифатида совринлар ютишни истади. Бунга эришди ҳам, мадридликлар "Аталанта"ни мағлуб қилиб, УЕФА Суперкубогини қўлга киритди ва кубокни капитан сифатида Модрич кўтарди. Эндиликда хорват 40 ёшида ҳам жамоа таркибида майдонга тушишни истайди. Буни ҳали ҳеч ким қила олмаган. 

"Реал" тарихида майдонга тушган энг қари футболчи Модричнинг ўзи ҳисобланади. Бу рекордни янгилаш учун ҳар қандай ўйинчига катта сабр керак бўлади, камига Лука ҳали кетмоқчи ҳам эмас. Катта эҳтимол билан унинг келажаги мавсум сўнггида ҳал бўлади. Аммо биз ҳар йили Мадрид клубидан қайсидир катта футболчи кетишига ўрганиб ҳам қолдик...