"Real" va "Barselona"ni qiziqtirayotgan "Bavariya" futbolchisining "ishtahasi karnay"!

"Bavariya"ning 23 yoshli chap qanot himoyachisi Alfonso Devis uning xizmatiga qiziqqan har qanday klubdan yiliga 20 million evro maosh so‘ramoqchi. Bu haqda Germaniyaning Sky Sport nashriga asoslanib Sport.es xabar bermoqda.

Manbaga ko‘ra, kanadalik futbolchining Myunxen klubi bilan 2025 yilning yozida tugaydigan shartnomasini uzaytirish ehtimoli juda past. Ayni damda Devisga "Real" faol qiziqish bildirmoqda, ammo bu raqobatda Madrid klubiga "Barselona" va "Manchester Yunayted" klublari ham qarshilik ko‘rsatishi mumkin. Avvalroq himoyachi “Bavariya”ning yiliga 14 million evrolik taklifini rad etgani ma’lum bo‘lgan edi.

Joriy mavsumda Devis barcha musobaqalarda sakkizta uchrashuvda qatnashib, bitta golli uzatmani amalga oshirdi. Futbolchining klub bilan amaldagi mehnat shartnomasi 2025 yilning yoziga qadar imzolangan. Transfermarkt portalida berilgan ma’lumotlarga ko‘ra, futbolchining bozor qiymati 50 million evroni tashkil qiladi.