“Реал”: Винисиус ўрнини 16 ёшли вундеркинд эгаллайди

“Реал” яқин келажакда бразилиялик легионер Винисиус Жуниорнинг кетишига тайёргарлик кўрмоқда. Мадридликлар ҳозирдан бу юлдузга ўринбосар топиб қўйди.

Манбаларга кўра, “Қироллик клуби” Англия Чемпионшипида “Лестер Сити” шарафини ҳимоя қилаётган 16 ёшли Жереми Монгани олиб келишни режалаштиряпти.

Айни пайтда ёш ҳужумчи Европанинг бир неча клублари нишонида турибди. Бироқ улар орасида “Реал” трансфер ҳаракатларини анча эрта бошлашга тайёр.

“Реал”нинг трансфер сиёсатида турли лигалардан иқтидорли ёш ўйинчиларни олиб келиб, уларни клуб анъаналари асосида тарбиялашга катта урғу берилади.  Экспертларнинг таъкидлашича, Монганинг фақат олдинга интилиши, тезкорлиги, учрашувларни ҳал қила олиш қобилияти ва ўйин услуби Винисиус Жуниорнинг ёшлигини эслатиб юборади.

Монга ўтган мавсумда “Лестер” ҳали Премьер-лигада ўйнаётган даврда 15 ёшида жаҳоннинг энг мураккаб чемпионатида дебют ўтказган. Ўшанда “Лестер”ни бошқарган Рууд ван Нистелрой уни Премьер-лига учрашувида майдонга туширишдан чўчимаган ва шу тариқа, Жереми Монга АПЛда дебют қилган энг ёш ўйинчи сифатида тарихдан жой олди.