“Реал” юлдузи Арда Гюлерга янги жамоа топиб беришди

Яқинда “Реал”нинг 20 ёшли ҳужумкор футболчиси  Арда Гюлер ўзига етарли даражада ўйин амалиёти берилмаётганидан норози эканини билдирган ва ёзда бошқа клубга ўтиши мумкинлиги ҳақида маълумотлар тарқатилган эди.

Туркия терма жамоаси ярим ҳимоячими Ҳоқон Чалханўғли ҳамюртини ўзи ўйнаётган “Интер”га таклиф қилди.

- Арда Гюлер жуда муҳим ўйинчи ва мен уни жуда яхши кўришимни ҳамма билади. Унинг “Реал”даги аҳволи қандай эканини чуқур билмайман ва унинг ишларига аралашмоқчи ҳам эмасман. Нималар бўлаётганини унинг ўзи яхшироқ билади.

Мен унга кўпроқ ўйнашни тавсия қилган бўлардим, чунки у бунга лойиқ. Шу боис, мен унинг “Интер”га келишини истайман. Вазият айнан шундай ечим топишига умид қиламан, - деди туркиялик тажрибали футболчи.

Арда Гюлер “Реал”га 2023 йилнинг ёзида “Фенербаҳче”дан олиб келинган. Жорий мавсумда у барча турнирларда 30 та учрашувда майдонга тушиб, учта гол ва бешта ассист қайд этди.