"Реал"даги беш нафар ўйинчининг умумий қиймати АПЛ, Ла Лига ва А Сериядаги бир неча клубнинг таркибидан қимматроқ

"Қироллик клуби"нинг ярим ҳимоя ва ҳужумдаги қўрқинчли футболчилари бир нечта гранд клубларнинг умумий таркибидан ҳам қимматроқ ҳисобланади. Жуд Беллингем, Федерико Вальверде, Родриго, Килиан Мбаппе ва Винисиус Жуниорнинг умумий Трансфермарктдаги нархи 770 миллион евро. Бу сумма АПЛ, А Серия ва Ла Лиганинг бир нечта гранд клубларининг умумий таркибидан қимматроқлиги маълум бўлди.

АПЛдан фақатгина бешта жамоаси: "Манчестер Cити", "Арсенал", "Ливерпуль", "Манчестер Юнайтед", "Челси" ва "Тоттенҳем" клубларининг таркиби "Лос-Бланкос"нинг бешта футболчиси нархидан юқорироқ.

Ла Лигада эса бундай кўрсаткич ягона "Барселона" клубида эканлиги аниқ бўлди . Жамоанинг Трансфермарктдаги умумий қиймати 940 миллион евро. Эслатиб ўтамиз, "Атлетико" ўйинчиларининг умумий суммаси 565 миллион еврони ташкил қилмоқда. 

А Серия клубларида эса бу бешлик билан тенглаша оладиган жамоа йўқлиги маълум бўлди. Яъни ҳеч қайси жамоанинг умумий нархи 770 миллион еврога тенг ёки ундан баланд эмас. Маълумот ўрнида, Италия олий лигасининг энг қиммат таркибга эга клуби - "Интер" футболчиларининг умумий трансфер нархи 681 миллион евро деб баҳоланмоқда.