“Реал”дан ҳайдалиши кутилаётган Анчелотти Бразилия терма жамоасига жавобини айтди

Европа Чемпионлар лигасининг амалдаги ғолиби “Реал” бу йилги мусобақадан эрта чиқиб кетганидан кейин жамоа бош мураббийи Карло Анчелоттининг клубдан кетиши ҳақидаги хабарлар кўпайиб бормоқда.

Бу вазиятдан Бразилия футбол конфедерацияси фойдаланиб қолмоқчи бўлди. Бразилияликлар италиялик мутахассисни анчадан бери терма жамоани бошқаришга чорлаб келади.

Marca нашрининг ёзишича, Карло Анчелотти яна бир бор бразилияликлар таклифини қабул қила олмаслигини маълум қилди.

65 ёшли мутахассис “Реал”даги ишини давом эттирмоқчи ва истеъфога чиқмоқчи эмас. “Қироллик клуби” раҳбарияти Анчелоттининг жамоада қолиш истагидан хабардор. Клуб президенти Флорентино Перес италиялик мураббий билан дўстона муносабатларини сақлаб қолмоқчи.

Анчелотти бош мураббийликдан олинган тақдирда ҳам “Реал” хўжайинлари унга бошқа иш беришга тайёр.

Бразилия футбол конфедерацияси Анчелоттининг фикрини ҳурмат қилган ҳолда, эътиборини бошқа мутахассисга қаратадиган бўлди. Улар терма жамоа бошқарувига “Ал-Ҳилол”да ишлаётган Жорже Жезушни олиб келмоқчи.