“Реал”га 160 миллион еврога икки юлдуз таклиф қилинди. Биттаси Ҳусановнинг рақобатчиси

Мадриднинг “Реал” клубига Европа футболининг икки юлдузи – Рубен Диаш ва Жоау Невеш таклиф қилинди.

El Debate  нашрининг маълумотига кўра, ҳар икки футболчининг хизматларини мадридликларга машҳур агент Жорже Мендеш таклиф қилган. У сўнгги ойларда “Қироллик клуби” раҳбарияти билан яна фаол ҳамкорлик қилишни бошлаган.

Қайд этилишича, ПСЖ ва Португалия терма жамоаси ярим ҳимоячиси Жоау Невеш “Реал”га ўтишга жиддий қизиқиш билдирмоқда. Бироқ трансфердаги асосий муаммо футболчининг юқори нархи. Париж клуби уни камида 80 миллион евро ва бонуслар эвазигагина қўйиб юборишни кўриб чиқмоқда.

Шу билан бирга, “Реал” президенти Флорентино Перес ва ПСЖ раҳбари Нассер Ал-Хелаифи ўртасидаги муносабатлар сезиларли даражада яхшилангани айтилмоқда. Бу эса эҳтимолий музокараларда муҳим роль ўйнаши мумкин.

Рубен Диашга келсак, “Манчестер Сити” марказий ҳимоячиси ҳам фаолиятини “Сантьяго Бернабеу”да давом эттиришга қарши эмас. Хосеп Гвардиола инглиз клубини тарк этганидан кейин жамоа етакчиларининг келажаги ноаниқ бўлиб қолмоқда.

Хабар қилинишича, “Манчестер Сити” ўз ҳимоячисини тахминан 80 миллион еврога баҳоламоқда. Бироқ мадридликлар музокаралар бошланса, трансфер суммасини пасайтиришга уриниб кўради.