"Реал"нинг мағлубиятига футболчиларининг дангасалиги ҳам сабаб бўлмоқда

"Реал Мадрид" жамоаси футболчилари УЕФА Чемпионлар Лигаси чорак финалининг биринчи учрашувида Лондоннинг "Арсенал" футболчиларига нисбатан 10 километр камроқ масофани босиб ўтди (0:3).

Клуб раҳбарияти бу маълумотларни кўриб, ўйинчиларнинг жисмоний тайёргарлиги даражасидан норозилигини билдирди. "Marca" нашрининг хабар беришича, плей-офф босқичининг бошқа учрашувида иштирок этган "Бавария" ва "Интер" жамоалари футболчилари 20 километр кўпроқ югурганлар.

Таъкидланишича, жисмоний тайёргарлик бўйича мураббий Антонио Пинтуснинг иши кутилган натижаларни бермаяпти. Бунга фақат у эмас, балки айрим футболчиларнинг дангасалиги ҳам сабаб бўлмоқда. Ушбу муаммо "Реал"ни анча вақтдан бери таъқиб этиб келмоқда, аммо илгари унга етарлича эътибор қаратилмаган эди.