"Рио-2016" чемпиони узоқ муддатга дисквалификация қилинди

Нигериялик пара пауэрлифтингчи Пол Кехинде антидопинг қоидаларини бузгани учун жазога тортилди. Унинг 2020 йил март ойида топширган допинг синамасида тақиқланган модда аниқланди.

Халқаро Паралимпия қўмитаси спортчини 30 ойга дисквалификация қилди. Энди Кехинде 2020 йилнинг 9 мартидан 2022 йилнинг 8 сентябрига қадар бўлган муддатда ўтказиладиган барча мусобақаларда иштирок эта олмайди.

Маълумот учун, Пол Кехинде эркаклар ўртасида -65 кг вазн тоифасида "Рио-2016" ёзги Паралимпия ўйинлари чемпиони ҳисобланади. Бундан ташқари у 2017 йил Мексикада ўтказилган жаҳон чемпионатида ҳам олтин медални қўлга киритган.