Роберто Мартинес: "Криштиану Роналду "Ан-Наср"га ўтгач ҳам ўз даражасини йўқотмаган"

Португалия терма жамоаси бош мураббийи Роберто Мартинес Криштиану Роналдунинг Саудия Арабистонининг "Ан-Наср" клубига ўтганидан кейин ҳам ўйин даражаси пасаймаганини таъкидлади.

Унинг айтишича, Роналдуда ҳали ҳам ғалаба қозониш истаги жуда кучли ва у миллий жамоа учун катта аҳамиятга эга.

"Мен унинг даражаси пасайганини кўрмаяпман. У ҳали ҳам жуда яхши ўйнаяпти ва Португалия терма жамоаси учун қанчалик муҳим эканини исботлади", — деди Мартинес.

Мураббий Роналдунинг барча ютуқларига қарамай, унинг ғалабага бўлган чанқоғи сўнмаганини ҳам алоҳида таъкидлади.

"Унинг ғалаба қозониш иштиёқи ҳали ҳам жуда юқори. Бу ҳақиқатан ҳам ҳайратланарли", — дея таъриф бериб ўтди.

Шу билан бирга, Мартинес миллий жамоада жой фақат ном ва ютуқлар билан кафолатланмаслигини ҳам қайд этди.

"Жамоага фойда келтириш ҳам муҳим. У капитан ва катта ютуқларга эга бўлса-да, ҳар бир футболчи каби у ҳам бир хил мажбуриятларга эга", — деди Португалия терма жамоаси бош мураббийи.