Рашид Ғофуров: "Камолиддин Тожиев таваккал қилишни истамади"

Ўзбекистон Кубоги доирасидаги “Пахтакор” – “Яйпан” (4:1) ўртасидаги учрашувдан кейин меҳмонлар бош мураббийи Рашид Ғофуров матбуот анжуманида қатнашди.

- Авваламбор, “Пахтакор”ни ғалаба билан табриклайман. “Пахтакор” ўз номи билан “Пахтакор”. Клубни бир нечта футболчилари терма жамоага кетганини билардик. Лекин “Пахтакор” ҳар доим олдига олий мақсад қўйган, чемпионлик учун курашадиган жамоа. Шу боис захира ўриндиғи ҳам кучсизланиб қолмайди. Захирасида ўтирган ўйинчилари бемалол Суперлигани бошқа клубларида асосий таркибларида ўйнай оладилар. Бу яна бир бор исботини кўрсатди. Бизни футболчилар бошқача атмосферага тушиб қолишди. “Пахтакор” майдонида ўйнаш, босим...Охирги 15-20 дақиқа давомида кўрсатган ўйинини бошидан миясига сингдиришганида ҳар қандай жамоа билан ўйнаса бўлади. Аммо бошида гол ўтказиб юбормаслик мақсадида ўйнаб, кейин хатолар олиб келишди. “Пахтакор”ни жуда яхши жамоалигини кўриб турибмиз. Бугун яна бир бор исботлашди. Биргина бизга қарши эмас, Суперлигада ҳам ўйнаганида албатта ғалаба қозонади. Ўйин услуби бор жамоа.

- “Пахтакор” ўзида қолган таркибдан энг кучлисини майдонга ташлади. Бунга нима дейсиз?

- Тўғри, кутгандим. Сабаби, ундан олдин “Ғазалкент” “Динамо” билан ўйнади. “Лочин” “Локомотив” билан беллашди. Суперлига клубларини қийинчилик билан ютгани ё дуранг ўйнагани ва шунингдек, мағлубиятларга учраганлари бор-да. Шуни инобатга олиб, Камолиддин Тожиев таваккал қилишни истамади. Олдига қўйилган вазифани бошидан бошлаб мақсад қилди, охиригача олиб борди. Ёшларни қўйиб, кейин нимадир бўлгандан кўра, бошидан натижа учун ўйнаган яхши. Бошидан таркибини кўрдим, курашувчан таркиб эди.

- Жамоага гуруҳдан чиқиш вазифаси қўйилганми?

- Биз учун 100 фоиз гуруҳдан чиқиш вазифаси қўйилгани йўқ. Бироқ йигитлар ўзлари қанчалик яхши ўйнаб ғалабалар қозонса, ўз-ўзидан гуруҳдан чиқиш мақсади бўлади. Аммо раҳбарият томонидан Кубокда иложи борича тепароққа бориш мақсади йўқ. Футболчилар ўзи учун мақсад қўйган. “Пахтакор”, “Сурхон” ва “Каттақўрғон” бор бўлган бу гуруҳ энг кучлиси бўлиб қолди. “Каттақўрғон” про лига вакили ва мақсади бор жамоа. “Сурхон” муаммоларга дуч келган тақдирда ҳам барибир Суперлига деган номи бор. Муаммо майдондан ташқарида бўлади. Майдонда эса барча муаммолар эсдан чиқиб кетади. Гуруҳдаги нозикроғи бизмиз-да. Бундай ўйинлар футболчиларимизга катта мотивация ва катта тажриба бўлади.