Родри тарихда ўзига хос ютуқлар тўпламига эга бўлган 11-ўйинчига айланиши мумкин

Испания терма жамоаси ва «Манчестер Сити» ярим ҳимоячиси Родри футбол тарихидаги энг нуфузли рўйхатга кириш арафасида турибди. У дунё чемпионати, Чемпионлар лигаси ва «Олтин тўп»ни қўлга киритган кам сонли футболчилар сафига қўшилиши мумкин.

Ҳозирча бу «элита клуб»да бор-йўғи ўн нафар футболчи бор: Бобби Чарльтон, Франц Беккенбауэр, Герд Мюллер, Паоло Росси, Зинедин Зидан, Ривалдо, Роналдиньо, Кака, Лионель Месси ва Усман Дембеле.

Родри «Манчестер Сити» таркибида 2022–23 йилги мавсумда Чемпионлар лигасида зафар қучди. 2024 йилда эса у дунёнинг энг яхши футболчисига бериладиган «Олтин тўп» соҳиби бўлди. Энди испаниялик футболчига фақат дунё чемпионлиги етишмаяпти.

Испания терма жамоаси Францияни 2:0 ҳисобида мағлуб этиб, жаҳон чемпионати финалига йўл олди. Шу тариқа жамоа ўз тарихида иккинчи бор дунё чемпиони бўлиш имкониятини сақлаб қолди.