"Roland Garros". Амалдаги чемпион чорак финалга чиқди, Зверев сенсация қурбонига айланди

"Катта дубулға" туркумига кирувчи "Roland Garros" турнирида 4-босқичнинг дастлабки кун баҳслари ўтказилди. Умумий ўтказилган 4 ўйиннинг барчасида сараланган ракетка усталари иштирок этди ва улардан бири турнир билан хайрлашди.

Кейинги босқич масаласини жуда осон ҳал этган илк теннисчи Рафаэль Надаль америкалик Себастьян Корда билан ўзаро муносабатларга ойдинлик киритиб олди. Рақибига атиги 3 сет ва 4 гэймни раво кўрган амалдаги чемпион ўз юришини ишонч билан давом эттирди. Якуний ҳисоб: 6:1, 6:1, 6:2.

Шунингдек, аргентиналик Диего Шварцман ҳам 3 сетда италиялик Лоренцо Сонего устидан зафар қучди. Надалдан фарқли ўлароқ, Шварцман ўз рақибига 8 та геймни ютқазди, аммо ўзи 18 геймни ўз ҳисобига ёздирган ҳолда, 6:1, 6:3, 6:4 ҳисобида ғалаба қозонди.

3-тартиб рақам остида сараланган Доминик Тим ҳам ушбу босқичдан муваффақиятли ўтиб олди. Франциялик Гюго Гастонга қарши ҳақиқий жанг ўтказган Тим 5 сет давом этган учрашув тақдирини ўз фойдасига ҳал қилишни уддалади. Дастлабки 2 сетни ўз ҳисобига ёздирган Тим кейинги 2 тасида имкониятни бой берди. Аммо ҳал қилувчи сетда айнан австриялик ракетка устасининг асаблари мустаҳкамроқ бўлиб чиқди. Якуний ҳисоб: 6:4, 6:4, 5:7, 3:6, 6:3.

"Roland Garros-2020"да кўникиб қолганимиздек, бугун ҳам чемпионлик учун даъвогарлардан бири ракеткасини ғилофга жойлашга мажбур бўлди. Германиялик Александр Зверев чорак финал остонасида италиялик рақиби Янник Синнерга қарши кортга чиқди. Рейтингда юқорироқ поғонада жойлашган рақибини кўп жабҳаларда мағлуб эта олган Синнер ҳужумларда анча агрессив ҳаракат қилди. Бунга олдиндан тайёргарлик кўрмаган Зверев учрашувни 6:3, 6:3, 4:6, 6:3 ҳисобида бой бериб, турнир билан хайрлашди.