“Рома” юлдузи “Интер” учун гол урди. Унинг трансферини ҳеч ким эълон қилгани йўқ!

Элдор Шомуродовнинг асосий таркиб учун рақобатчиси ҳисобланган Эдин Жеко бошқа жамоага ўтиб кетди.

Босниялик ҳужумчи “Интер” таркибида Киевнинг “Динамо” жамоасига қарши ўртоқлик учрашувида майдонга тушиб, 34-дақиқада рақиб дарвозасини ишғол қилди.

Жеко иккинчи бўлимда ўз ўрнини Андреа Пинамонтига бўшатиб берди.

Маълумотларга қараганда, “Рома” ҳужумчиси ҳисобланган Эдин Жеко Милан шаҳрига “Интер” билан шартнома бўйича музокарага келган эди. Бироқ, унинг клуб билан шартнома тузгани расман эълон қилинмади.

Шунга қарамай, италиялик журналистлар 35 ёшли тўпурар миланликлар билан икки йиллик битим тузганини таъкидламоқда.

Жеко “Рома”да 2015 йилдан бери ўйнаётган эди. Унгача бу ҳужумчи “Манчестер Сити” ва “Вольфсбург” шарафини ҳимоя қилган.