“Рома”нинг Шомуродов бўйича режаси ўзгарди, Элдор эса кутилмаган жамоани кўзлаяпти!

Қишки трансферлар ойнаси ёпилишига бир неча кун қолган паллада “Рома” спорт директори Тьягу Пинто жамоа ҳужумчиси Элдор Шомуродов бўйича трансфер режасини ўзгартирди.

Аввалига, клуб раҳбарияти легионеримиздан тўлиқ қутилиш мақсадида унга даъвогар бўлган жамоалардан трансфер учун бадал пулини бирданига тўлаш ёки ёзда трансферни амалга ошириш мажбуриятини олиш талабини қўйиб келди.

Рим клуби 2021 йилда “Женоа”дан 18 миллион еврога харид қилинган ҳужумчини 12-14 миллион еврога баҳолади. Аксарият харидорлар ярим йиллик ижара ва ҳужумчининг натижаларига, кўрсатган ўйинларига қараб, мавсумдан кейин  трансфер қилиш ҳуқуқини сўради.

Элдорнинг ўзи Германия, Испания ва Франциядан келган таклифларни рад этиб, Италия қолишга қарор қилганидан кейин танлов чегараси ҳам бирданига қисқарди. Охирига келиб,  А Серия аутсайдерлари – “Кремонезе” ва “Специя” қолди.

Бу паллада Тьягу Пинто трансфер бўйича талабини ўзгартирди. У Жозе Моуриньога керак бўлмай қолган ўйинчиларнинг барчасини харидор жамоалардан тўлиқ трансфер қилишни сўраётган эди. Элдор Шомуродов, Рик Карсдорп, Матиас Вина ва ҳатто Николо Дзаньоло учун бирданига тўлов қиладиган ёки кейинчалик сотиб олиш мажбуриятини бўйнига оладиган бирорта жамоа топилмади.

Шундан кейин Тьягу Пинто трансфер сиёсатини ўзгартиришга мажбур бўлди. Энди у футболчиларни ярим йиллик ижарага жўнатишга рози. “Борнмут” римликларни Матиас Винани мавсум охиригача бериб туришга кўндирганидан кейин бошқа ўйинчилар бўйича ҳам шу йўл тутиладиган бўлди.

Алам қиладигани“Торино” ва “Болонья” каби жиддий клублардан бир неча бор уриниб, Шомуродовни қўлга кирита олмагач, курашдан чиқиб кетди. Бунга Тьягу Пинтонинг ортиқча талаблари сабаб бўлди. Энди Шомуродов олдида аутсайдерлардан бирини танлаш имкони қолди холос.

Tuttomercatoweb нашрининг таъкидлашича, ўзбек ҳужумчиси “Специя”га ўтишга яқин. “Рома” Элдорни маълум муддатга ижарага беришга рози. “Специя” аввалига бир миллион атрофида ижара пули таклиф қилаётган эди. Энди “Рома” ўйинчини тўлиқ сотиб олиш мажбуриятини юкламасдан, вақтинчалик ижара учун каттароқ сумма ундирмоқчи.

Нуфузли манбалардан бири https://romapress.net сайти журналистини Жон Соланонинг ёзишича, Ўзбекистон миллий терма жамоаси ҳужумчиси “Рома”да захирада ўтиришдан зериккан ва келажакда ҳам шу ҳолат такрорланмаслиги учун клубдан бутунлай кетмоқчи бўляпти.

Маълумот ўрнида айтиш жоизки,  агар шу кунларда бошқа вариант чиқмаса, Элдор “Специя”ни танлагани маъқулроқ. Чунки бу клубнинг “Кремонезе”дан фарқли равишда юқори дивизиондаги ўрнини сақлаб қолиш имконияти юқорироқ.

“Специя” 19-турдан кейин 18 очко билан 16-поғонада бормоқда. Жамоани хавфли ҳудуддан олти очко ажратиб турибди. “Кремонезе” ҳали бирор маротаба ғалаба нашидасини сургани йўқ ва атиги еттита дуранг билан сўнгги поғонада қайд этилган. Кремонеликларнинг мураккаб вазиятдан қутилиб қолиши амри маҳол.

Демак, “Рома” Шомуродовдан тўлиқ воз кечгани йўқ. Ўйин амалиётига эга бўлиш учун ҳужумчимиз бир неча ой бошқа жамоада ўйнаб келиши кутилмоқда. Агар вазият шундай якунланса, Элдор ўзига доимий тўп тепадиган бошқа клуб топиш ишларини ёзга қолдиришига тўғри келади.

Кутамиз!

Ўрунов Премьер-лига даражасидаги футболчи!

Югуришни ўзбек легионеридан ўрганинг!