Югуришни ўзбек легионеридан ўрганинг!
Европада тўп тепаётган легионерларимиздан бири Отабек Шукуров “Фотиҳ Карагумрук” жамоасининг етакчи ўйинчиларидан ҳисобланади.
Туркия Суперлигасида қатнашаётган бу жамоа 20-турда “Аланьяспор” меҳмони бўлиб, кескин ва муросасиз ўтган учрашувда 2:2 ҳисобида дуранг ўйнади.
Статистик маълумотларга ихтисослашган Instat сайти чемпионатнинг 20-турида майдонда энг кўп масофа босиб ўтган футболчилар рейтингини эълон қилди.Унга кўра, кучли бешликнинг энг юқори икки поғонасини Андре Пирло шогирдлари – италиялик ярим ҳимоячилар Маттео Риччи ва Отабек Шукуров қайд этилган.
“Аланьяспор”га қарши баҳсда Риччи жами 13.99 километр масофани босиб ўтган. Иккинчи кўрсаткични қайд этган Отабек Шукуров 13.24 километр югурган.
Шунингдек, кучли бешликдан “Башакшеҳир” вакиллари Маҳмуд Текдемир ва Беркай Ўзжан, “Аланьяспор” ўйинчиси Умут Гунеш ҳам ўрин олди.
Отабек Шукуров юртимиз футболига кўплаб истеъдодли ўйинчиларни тарбиялаб берган “Машъал” тарбияланувчиси ҳисобланади. Профессионал фаолиятини шу жамоада 2014 йилда бошлаган.
Бир йилдан сўнг, истеъдодли марказий ярим ҳимоячи “Бунёдкор”га кўчиб ўтди. У пойтахт клубида 2017 йилнинг охиригача тўп тепди.
Отабек 2018 йилнинг январида Бирлашган Араб Амирликларининг “Шаржа” клубига трансфер қилинди ва илк бор легионер мақомини олди. Араб диёрида бир неча мавсумни муваффақиятли ўтказган футболчимиз ўтган йили ёзда фаолиятини Европа футболида – Туркия чемпионатида давом эттиришга қарор қилди.
Шукуров “Фотиҳ Карагумрук” сафига қўшилганидан бери Туркия Суперлигаси ва мамлакат кубогида жами 18 та учрашувда қатнашиб, рақиблар дарвозасига битта тўп киритишга муваффақ бўлди.
Яқин ўтмишнинг машҳур футболчиси – Андреа Пирло бошқараётган бу жамоа Суперлига ўртамиёналаридан ҳисобланади.
Бу жамоада Отабек италиялик Эмилиано Вивиано, Давиде Бираски, Маттео Ричч, Фабио Борини, сенегаллик Мбайе Диань, сербиялик Адем Ляйич каби номдор футболчилар билан бирга ўйнамоқда.
26 ёшли футболчимиз 2016 йилдан бери Ўзбекистон миллий терма жамоасига жалб қилиб келинмоқда. Ҳозирчага мамлакатимиз бош жамоаси либосида 50 та учрашувда майдонга тушган ва ўз ҳисобига учта тўп ёздириб қўйган.
Отабек терма жамоада Хитой, Сенегал ва Саудия Арабистони дарвозасини ишғол қилган ва жамоадошларига учта голли пас узатган.
Шукуров клублар миқёсида шу кунга қадар 205 та учрашувда майдонга тушиб, 16 та гол ва 11 та ассист муаллифи бўлди.
Фикрлар