Роналду синмайдиган суперрекорд ўрнатди

Саудия Арабистони чемпионатининг биринчи турида “Ан-Наср” футболчилари “Ат-Таавун” устидан 5:0 ҳисобида зафар қучган эди. Ушбу баҳсда пенальтидан тўп киритган Криштиану Роналду бир неча рекордларни янгилади.

Экспертларнинг таъкидлашича, 40 ёшли юлдузнинг айрим натижа ва кўрсаткичларини такрорлашнинг имкони йўқ.

Роналду бир аниқ зарба билан профессионал фаолиятида расмий учрашувларда урган голлари сонини 940 тага етказиб олди ва бу кўрсаткич мутлақ рекорд ҳисобланади. Криштианунинг бундан буён клуб ва терма жамоада киритган ҳар бир тўпи янги рекорд сифатида қайд этилаверади.

“Ат-Таавун” дарвозасига урилган гол Криштиану Роналдуга яна бир суперрекорд келтирди. Португалиялик тўпурар кетма-кет 24 та мавсумда гол урган жаҳондаги ягона футболчи. У биринчи голини 2002-2003 мавсумда “Спортинг” таркибида “Морейренсе”га урган. Португалиядан кейин Англия, Испания, Италия ва Саудия Арабистонида чемпионатларида ҳар мавсум рақиб дарвозасини ишғол қилиб келмоқда.

Роналду бешта жамоа таркибида 100 тадан кўп гол урган ягона футболчи. Хусусан, Криштиану “Реал”да 450, “Манчестер Юнайтед”да 145 та, “Ювентус”да 101 та, “Ан-Наср”да 101 та ва Португалия терма жамоасида 138 та тўп киритган.