Россия футболи: Ўзбек футболчилари даромад келтирди
17 октябрдан 18 октябрга ўтар кечаси Россияда трансфер бозори ёпилади. Ҳозиргача, Россия премьер-лигаси иштирокчилари трансферлар учун 75 миллион евродан ортиқ маблағни сарфлаб улгурди. Албатта, Европа футболида бу катта харажат ҳисобланмайди.
Мисол тариқасида, Англия кублари ёзги трансфер бозорида 1,2 миллиард евролик харидларни амалга оширганини келтириш мумкин. Янада аниқ айтадиган бўлсак, Европа чемпионлар лигасида “Краснодар” билан бир гуруҳдан жой олган “Челси” биргина Кай Хаверц учун Россия клубларининг трансфер харажатларини қўшиб ҳисоблагандаги суммадан кўп маблағ сарфлади.
Бироқ, ўтган мавсумда Россия клублари ўз таркибини кучайтириш учун 235 миллион евро сарфлаганини инобатга олсак, бу йилги савдо сиёсатига коронавирус пандемияси жиддий таъсир қилгани намоён бўлади. Бундан ташқари, Россия футболида легионерларга киритилган лимит ҳам жамоаларнинг трансфер бозоридаги фаоллигига тўсқинлик қилмоқда.
Россия трансфер ойнаси якунлари ҳисоб-китоб қилина бошлади. Унга кўра, жамоаларнинг аксарияти бу бозордан харажат билан чиқди. Қизиғи, энг кўп фойда кўрган икки клуб ўзбекистонлик футболчиларни бошқа жамоаларга трансфер қилган “Ростов” ва “Уфа” бўлди.
“Ростов” Европа Лигасидаги иштирокини эрта якунлаганидан кейин Элдор Шомуродов бошлиқ кўплаб футболчиларини сотиб юборди.
Transfermarkt портали маълумотига қараганда, ростовликларнинг энг қиммат трансфери “Женоа”нинг Элдор Шомуродов учун тўлаган 7,5 миллион евро миқдордаги маблағи бўлди. Шунингдек, бу жамоа Алексей Ионовни 3,5, Евгений Черновни 3, Бахтиёр Зайнутдиновни 2, Александр Зуевни 1,5 миллион ва яна бир қанча ўйинчини бир неча юз мингга сотиб юборди. Олиб келинган ва сотиб юборилган футболчилар савдосидаги баланс 10,14 миллион еврони ташкил қилди.
“Уфа” клуби трансфер бозоридан 6,76 миллион евро фойда кўрди. Хусусан, уфаликлар Даниил Фоминни 3,5, Сильвестр Игбунни 2 ва Остон Ўруновни 1,5 миллион евро эвазига Москва клубларига трансфер қилди. Яна икки футболчи - Греция ва Словения клублари харид қилди. Кетганларнинг ўрнини қоплаш учун эса, “Уфа” раҳбарияти бир миллион евро атрофида маблағдан воз кечди холос.
Шунингдек, Россия премьер-лигаси вакилларидан “Тамбов” (баланс +1 млн евро) “Арсенал” (баланс +0,9 млн евро), “Ахмат” (баланс +0,47 млн евро), “Химки” (баланс +0,33 млн евро) клублари трансфердан оз бўлса-да, маълум миқдорда фойда олди.
Бироқ, қолган ўнта жамоанинг баланси минус томонга ўтиб кетди. Ҳисоб-китобларга кўра, трансфер бозорининг харажатлари қуйидагича кўриниш олди:
ЦСКА (баланс –29,5 млн евро)
“Зенит” (баланс –26,82 млн евро)
“Динамо” (баланс –12,95 млн евро)
“Краснодар” (баланс –6,1 млн евро)
“Рубин” (баланс –6 млн евро)
“Спартак” (баланс –5,55 млн евро)
“Сочи” (баланс –1,4 млн евро)
“Локомотив” (баланс –0,8 млн евро)
“Урал” (баланс –0,56 млн евро)
“Ротор” (баланс –0,122 млн евро)
Фикрлар