Rossiyalik mutaxassis: "O‘zbekistonda har doim iqtidorli futbolchilar etishib chiqqan"

Bir necha yillar Rossiya terma jamoasining murabbiylar shtabida ishlagan va yana Rossiya premer-ligasida, shuningdek, Vengriya va Polsha chempionatlarida samarali faoliyat olib borgan Miroslav Romashenko Sports.uz saytiga intervyu berdi. 50 yoshli mutaxassis faoliyati va yurtimiz futboli haqidagi savollarga javob berdi.

- Miroslav Yurevich, adashmasam oxirgi boshqargan klubingiz “Axmat”. Murabbiy uchun vaqtini sevimli ishidan tashqari o‘tkazish zerikarli bo‘lsa kerak?!

- Birinchi savolga kelsak, kunim murabbiy sifatida futbol bilan boshlanadi. Chunki saviyamni ko‘tarish uchun zarur bo‘lgan barcha imkoniyatlarni ishga solishim kerak. Avvalo, biror o‘yinni tomosha qilaman. Qolaversa, hayotimdagi hozirgi vaqtdan maksimal darajada foydalanib qolishim kerak. Aytishim kerak, RPLdan tashqari boshqa birinchiliklar o‘yinlarini ham tomosha qilish payida bo‘laman. Albatta, asosiy e’tiborni Evropadagi chempionatlarga qarataman. Darhaqiqat, ishlashda davom etish uchun menda sabab va istaklar etarlicha. Zero, faoliyatimda yangi qadamni tashlashni istayman.

- O‘zingiz ishlagan klublarda o‘zbek futbolchilarini ko‘rmoqchi bo‘lganingiz rostmi?

- Endi ikkinchi savolingizga kelsam, o‘zim ishlagan jamoalarda birinchi ish short-varoq bilan tanishishdan boshlangan. Nega deganda, har bir murabbiy tarkibni kuchaytirishga e’tibor qaratadi. Boz ustiga bunday paytda o‘sha varoqda doim bir qancha nomzodlar ism-shariflari, ular haqidagi barcha ma’lumot bo‘ladi. Ha, o‘zim tanishgan nomzodlar orasida o‘zbekistonlik futbolchilar ham bo‘lgan. Biroq bular aynan kimlar va qaysi klublardan ekanligini aytib o‘tishni xohlamagan bo‘lardim. Chunki eslashdan biror ma’no ko‘rmayapman va hammasi o‘tmishda qolib ketgan.

- Bosh murabbiylikdan tashqari qator jamoalarda yordamchi murabbiy bo‘lib ham ishlagansiz. Ikkala holatda ham javobgarlik hissi siz uchun bir xilmi?

- Nima deyishim mumkin: men o‘zimga nisbatan ancha talabchan odamman. Qaysi klubda ish boshlamay, doim maksimal kuch bilan ishga kirishaman. Boshqacha aytganda, borimni berib ishlashga harakat qilib kelganman. Ishimni iloji boricha sifatli qilib bajarish payida bo‘lishga harakat qilaman. Bilasizmi, har qanday inson qanday ish bilan mashg‘ul bo‘lmasin, avvalambor mas’uliyatni his qilmog‘i shart! Shu paytgacha o‘zim ishlagan jamoalarda ham atrofimda mana shunday kishilar bo‘lishiga e’tibor berganman. Agar biror ishga kirishsam, buni xuddi o‘zim uchun qilayotgandek bajarishga odatlanganman, desam buni mubolag‘aga yo‘ymang. Murabbiylik faoliyatimni boshlaganimdan beri zimmamdagi vazifani shunchaki yuzaki bajarishga o‘rganmaganman.

- O‘zbek futboli haqida gap ketganda birinchi navbatda nima degan bo‘lardingiz?

- Men sobiq ittifoqida tug‘ilganman, futbolchilik faoliyatimni ham o‘sha davrda boshlaganman. O‘sha paytda Ittifoq tarkibidagi har bir respublikaning bosh-asosiy jamoasi bo‘lardi. Jumladan, O‘zbekistonda “Paxtakor” ittifoq chempionatida ancha-muncha raqiblarning dodini berardi. Umuman olganda, O‘zbekistonda har doim iqtidorli - yorqin futbolchilar etishib chiqqan. Sizdagilar boshqalardan shijoati, texnik salohiyati ham o‘zgacharoq ekanligi bilan ajralib kelganlar.

- Faoliyatingiz davomida ko‘plab murabbiylar bilan ishlagansiz. Siz uchun Rossiyadagi eng kuchli mutaxassislar kimlar?

- Men uchun hech shak-shubhasiz, Oleg Ivanovich Romantsev alohida ahamiyat kasb etadi. U kishidan behad minnatdorman. Shuningdek, Valeriy Georgievich Gazzaevni ham alohida ko‘rsatib o‘tgan bo‘lardim.