Рўзиқул Бердиев: "Иккинчи бўлимда ўйинимизга тезлик қўшдик"

“Металлург” – “Насаф” (0:2) учрашувдан сўнг меҳмонлар бош мураббийи Рўзиқул Бердиев журналистларнинг саволларига жавоб қайтарди.

- Мухлисларимизни ва жамоамиз аъзоларини ғалаба билан табриклайман. Ўйинга келсак, биринчи бўлим тенг курашлар остида ўтди. Деярли ўртача вазиятлар бўлди. Иккинчи бўлимда ўйинимизга тезлик қўшдик. Қарши ҳужумларда имкониятларни яратишда фаолроқ бўлдик. Иккита голдан ташқари ҳам бир нечта вазиятларимиз бўлди. Асосийси, ғалабага эришдик, уч очкони қўлга киритдик. Бундан хурсандмиз, кейинги ўйинларга тайёргарлик кўрамиз.

- Кўп вазиятлар юзага келди. Айниқса, Хусайн Норчаев бўш дарвозага гол ура олмади. Бу ниманинг аломати ёки чарчоқними?

- Озгина совуққонлик етишмади. Хусайн ҳали катта тажрибага эга эмас. Лекин иккинчи голни ажойиб тарзда урди. Ўзи вазият яратиб, буни ўзи амалга оширди. Бундан хурсанд бўлдим.

- Биринчи бўлимда жамоа ўзига ўхшамади. Иккинчи бўлимда ўйинини кучайтира олди. Биринчи бўлимдаги муваффақиятсиз ўйиннинг сабаби нима?

- Биринчидан, “Металлург” жамоаси яхши ҳимояланди. Бу клуб кўпроқ ҳимоявий ўйин ўйнайди, 5 та ҳимоячи билан. Шунинг учун қийин бўлди. “Металлург” озроқ куч йўқотганидан кейин биз янги ўйинчиларни қўшдик. Баҳром Абдураҳимов, Шерзод Насруллаев ўйинга яхши киришиб кетишди, тезлигимиз янада ошди. Бу “Металлург” жамоасига муаммо туғдирди.