Рўзиқул Бердиев пенальтини нима сабабдан Черан тепмаганига аниқлик киритди
Ads

Олий лига 28-туридан ўрин олган “Насаф” – “Шўртан” (3:0) учрашуви якунига етгач, бўлиб ўтган матбуот анжуманининг дастлабки қисмида “Насаф” жамоасининг устози Рўзиқул Бердиев иштирок этди ва ўйин ҳақидаги фикрларини билдирди. Бу ҳақда Қарши клуби расмий сайти хабар бермоқда.

"Ўзларингиз ўйинни кўрдиларингиз, учта гол билан ғалабага эришдик. Аммо биз бу ҳисобни биринчи бўлимдаёқ таблога ёздириб қўйишимиз мумкин эди. Жуда кўп вазиятларни пучга чиқардик. Ўйин тўлиқ устунлигимизда ўтди. “Шўртан” жамоасини бугун ҳимояда ўйнашини билар эдик. Тезкор киритган голимиз ишимизни анча осонлаштирди. Бунда Абдураҳимов профессионалларча ҳаракат қилди. Умуман керакли ғалабани қўлга киритганимиздан мамнунман.

Пенальтини нега Черан амалга оширмади? Бугунги ўйинда агар пенальти бўлса, ким уни амалга оширишини олдиндан режалаштирганимиз йўқ эди. Буни майдондаги ўйинчиларнинг ўзи ҳал қилишди.

Бугун Бобир Абдухолиқов бизга ёрдам бера олмади,  бунга сабаб у ўтган ўйинда кичик жароҳат олган эди, шунга таваккал қилишни ҳоҳламадик. Бугун яна ўйин давомида етакчиларни алмаштирдик, бунга сабаб кейинги муҳим ўйинимизни ҳам ҳисобга олганимиз бўлди.

Йигитларга энди уч кун таътил берамиз. Жамоамиз 13 ноябрдан йиғилади ва навбатдаги ўйинга тайёргарликни бошлашади. Машғулотларни ёрдамчи мураббийларимиз Минчев ва Сибагатуллинлар ўтказиб туришади. Биз эса 15 ноябрдан машғулотларга қўшиламиз", - деб айтиб ўтди Бердиев.