Ro‘ziqul Berdievning akkreditatsiyasi vaqtincha bekor qilinadi
Coca-Cola Superliga 17-turidan o‘rin olgan “Nasaf” — “Lokomotiv” uchrashuvi yakuniga etgach mezbonlar ustozi Ro‘ziqul Berdiev hakamlar joy olgan maydon markaziga qarab bordi va ularga nisbatan nomaqbul harakatlarni amalga oshirdi.
Uchrashuv yakuniga etgach mazkur masala yuzasidan bosh hakam Ahrol Risqullaev hamda O‘zPFL komissari bildirgi taqdim etdi. Unda qayd etilishicha, uchrashuv yakuniga etishi bilan “Nasaf” futbol klubining qator futbolchilari hamda bosh murabbiy Ro‘ziqul Berdiev hakamlar brigadasini o‘rab olgan. Bu vaqtda bosh murabbiy bosh hakam libosini qo‘pol tarzda tortgan hamda uning qorin qismiga zarba bergan. Shundan kelib chiqib, O‘zPFL Ro‘ziqul Berdievga taqdim etilgan akkreditatsiyani tegishli qo‘mitalar mazkur vaziyatni o‘rganib chiqquniga qadar qaytib oladi. Bosh murabbiy O‘zbekiston Coca-Cola kubogining ¼ finalidan joy olgan “Lokomotiv”ga qarshi uchrashuv qaydnomasiga kiritilmaydi.
Chempionatning 18-turini o‘tkazish uchun “Nasaf” 10 sentyabr kuni Olmaliq shahriga tashrif buyuradi. Shundan kelib chiqib, O‘zPFL tegishli qo‘mitalar ishtirokidagi yig‘ilishni 9 sentyabr kuni o‘tkazish taklifini O‘FAga kiritdi. Bunda qaror bir tomonlama ko‘rib chiqilmasligini ta’minlash maqsadida qo‘mitalar yig‘ilishiga Ro‘ziqul Berdiev va Ahrol Risqullaevning o‘zi ham taklif etilishi ko‘zda tutilgan.
Bayram sababli dam olish kunlarining avvaldan belgilab qo‘yilgani, shuningdek, “Nasaf” ustozining Toshkentga kelishida muammo yuzaga kelmasligini ta’minlash maqsadida 8 sentyabr sanasi tanlab olindi. Berdievning akkreditatsiyasini qaytarish masalasi qo‘mitalar qaroridan keyin hal etiladi.
Ma’lumot uchun, hakamlar qaroriga shikoyat berish tartibi Reglamentning 14-bobida batafsil tushuntirib o‘tilgan. Garchi “Nasaf” jamoasi hakamlar brigadasiga etika normalariga zid ravishda e’tiroz bildirgan bo‘lsa-da, klub 14-bob bo‘yicha rasmiy e’tiroz bilan chiqmagan.
Manba: O‘zPFL sayti
Fikrlar