Рубин Хебай: "Менга билдирилган ҳеч бир таклиф қайтиш учун етарли даражада яхши эмасди"

Ўзбек футбо мухлисларига жуда яхши таниш бўлган албаниялик моҳир ҳужумчи Рубин Хебай яқинда Тунис чемпионатига кўчиб ўтгани ҳақида хабар бериб ўтгандик.

У Тунис Про лигасининг “Сфаксьен” клуби билан шартнома имзолади. Ҳолбуки, ёзги трансфер ойнаси пайтида Хебайни яна юртимизга қайтиши ҳам кутилганди. Бироқ амалда бундай бўлиб чиқмади. Sports.uz журналисти эса Хебайдан интервью олди.

- Рубин, сиз энди Тунис чемпионатида тўп суряпсиз. Бу кўпчилик учун кутилмаган юриш бўлди. Бунинг сабаби нимада?

- Сабаб шу бўлдики, менга яхши шартнома таклиф қилишди ва бу жой менинг фаолиятимда кейинги юришни амалга ошириш учун энг тўғри танлов деб ҳисобладим.

- Ёзги трансфер ойнаси вақтида сизни Ўзбекистон чемпионатида кутишганди. Лекин нархингизни қиммат деб эшитдик. Ўзбекистонга қайтиш ниятингиз бормиди?

- “Андижон”га келганимда мен учун ҳеч қандай трансфер суммаси тўламаган. Чунки эркин агент эдим. Чемпионатни кўрдим, футболчилар қандай маош олишларини кўрдим ва энг яхши ўйинчи бўлиш билан бир қаторда менинг ҳам ўзимга яраша кутилмаларим бор эди. Лекин менга билдирилган ҳеч бир таклиф қайтиш учун етарли даражада яхши эмасди.

- Тунис чемпионати ҳақида нималарни биласиз ва асосий мақсадингиз нима?

- Бу ҳақида кўп маълумотга эга эмасман. Аммо, фикримча, бу менинг фаолиятим ҳамда келажагим учун жуда муҳим трансфер ойнаси бўлади. Унда катта эҳтимол билан кейинги фаолиятим ҳал бўлса керак.

- Собиқ жамоангиз – “Андижон” Ўзбекистон Кубоги финалига чиқди. Буни кутганмидингиз ва финалда нимани кутяпсиз?

- Тўғрисини айтсам, буни кутмагандим. Чунки бошқа клубларда ҳам жуда яхши футболчилар бор, яхшироқ бюджетлари бор эди. Лекин айтиб ўтганимдек, ўтган мавсумда йигитлар охиригача курашишди ва улар бунга росмана лойиқ. Умид қиламанки, улар Кубокни қўлга киритишади, мухлисларини хурсанд қилиб, ўз номларини тарихга ёзиб қолдиришни уддалашади.

- Европада қачон ўйнайсиз?

- Мен келажакда нима бўлишини билмайман. Ўзбекистонга қайта олмайман деб ҳам айта олмайман. Бироқ ҳозирда келажагим ҳақида қайғуриб, унга эътиборимни қаратганман. Фақатгина Худо нима бўлишини билади.

- Саудия Арабистонида ярим йил тўп сурдингиз. Қандай таассуротлар қолди?

- Бу жуда яхши ярим мавсум бўлди ва Саудия Арабистони Суперлигасига чиқишдек мақсадига эриша олдик. Якунда мен клуб президенти билан гаплашдим ҳамда ўзаро келишган ҳолатда шартномани бекор қилдик. Албатта, улар бунинг ўзига яраша компенсация тўлашди.

- Нима учун янги клубингиз билан икки йиллик шартнома имзоладингиз?

- Бу ерда клуб кўплаб ёш футболчиларни харид қилган. Бизнинг мақсадимиз имкон қадар чемпионатда узоқроққа бора олиш, яхшироқ натижани қўлга киритиш. Миллий Кубок ва Африка Кубокларида ҳам ўзимизни кўрсата олишни мақсад қилганмиз. Бу жамоа Африка Кубогини энг кўп – 4 марта ютган клуб ҳисобланади. Умид қиламанки, бу ерда ўзимни яхши кўрсата оламан ҳамда имкон қадар кўпроқ гол уришга ҳаракат қиламан. Келгуси трансфер ойнаси вақтида янада яхши трансферни амалга ошириб, яхшироқ жамоага кўчиб ўтишга ҳаракат қиламиз.

Шуҳратбек Жўраев.