Рус нашри ўзбек футболи афсонасига нисбатан қилинган ноҳақлик борасида мақола эълон қилди

SPORTS.uz Россиянинг таниқли - Championat.com нашрида эълон қилинган мақолани эътиборингизга ҳавола этади. Эътиборлиси шундаки, рус матбуоти Жаъфар Ирисметовнинг "Спартак"да нега ўйнаб кета олмаганини тушунтириб беришга уринган.

Жасур Жалолиддиновнинг "Локомотив" билан шартнома имзолагани ёдингиздами? Юрий Белоус ўзбек футболчисини Жоау Мариудан кучлироқ эканлигини айтиб, уни Москвага олиб келган эди. Бу вазиятда унга ишонмасликнинг имкони бормиди? Клуб қанот ярим ҳимоячиси билан узоқ йиллик шартнома имзолаб, кейин ўртадаги битимни бекор қилди. Ҳозир бўлажак юлдуз Қозоғистоннинг "Қайрат" жамоаси билан шартнома имзолаган.

Эътиборлиси шундаки, ўзбек футболчилари билан бундай ҳолат РПЛда биринчи маротаба содир бўлгани йўқ. 2001 йилнинг январь ойида "Спартак" "Дўстлик" жамоасидан 25 ёшидаёқ ички чемпионатда 100 дан ортиқ гол урган Жаъфар Ирисметовни харид қилган эди. Ўшанда барча клуб ҳужумида ёлғизланиб қолаётган Робсонга ёрдамчи келаётганини тахмин қилганди. Айниқса, ЕЧЛ гуруҳ босқичи ўйинлари олдидан бу яққол кўзга ташланди. Афсуски, трансфер ўзини оқламади. Жаъфар "Спартак"ка руҳан мос эмас эди...

Романцев ўзини билмаганликка олди

Ҳужумчи Ўзбекистондаги сўнгги мавсумида барча рекордларни янгилаб ташлади. 37 ўйинда 45 гол! У ҳақидаги маълумот ўз-ўзидан Россиягача етиб келди. "Дўстлик"ка "Спартак"нинг иккинчи мураббийи Вячеслав Грозний алоқага чиқди. Футболчининг айтишича, унда кўплаб таклифлар бўлган, аммо "Спартак"ни хафа қилишни истамаган. Кўрикка келгач, у ҳаммани ҳайрон қолдиради. Биринчи машғулотдаги футбол ўйинида 4 та гол! Бу бош мураббий - Олег Романцевни ҳайратга солади. Машғулотлардан сўнг мураббий Ирисметовни ёнига чорлайди.

- Сен кимсан?
- Ўзбекистондан, Ирисметовман!
- Яхши ўйнадинг!

Бу диалог ҳақида Жаъфар Ирисметов кейинроқ берган интервьюсида шундай фикр билдирган: "Менимча, у мени аввалдан билган, аммо шу йўсинда танишишни хоҳлаган эди".

Кўп ўтмай, жамоа билан ҳали шартнома имзоламаган Жаъфар МДҲ кубогида иштирок этди ва голларни қалаштириб ташлади. Эътиборлиси, бу вазиятдан "Динамо" Киев фойдаланмоқчи бўлган. Украина клуби ҳужумчига Москва жамоасидан яхшироқ таклиф билан чиққан, аммо "Дўстлик" Ирисметовни "Спартак"ка қўйиб юборишга ваъда бергани учунгина трансфер барбод бўлади. Натижада, Жаъфар 4 йиллик шартномага қўл қўяди. Олег Романцев матбуот анжуманида бу трансферни ўзгача таърифлаган эди.

"Унда иккита йўл бор. Қишлоқдаги биринчи рақамли йигит бўлиш, ёки ЕЧЛда 4-5 ёки 10-ҳужумчига айланиш. Мен бир мавсумда юртида 45 та ёки Москвада 15 та гол уриш ҳақида сўраганимда, у иккинчи вариантни танлади".

ЕЧЛда билдирилган ишонч ва раҳбарият ҳақиқати

Москва, ҳашаматли уй, пойтахт марказидаги ҳаёт ва кўплаб бонуслар. Супер дебют учун бундан ортиқ нима керак? Ҳужумчи мураббийни шу қадар ишонтира олди-ки, Ирисметов ҳатто ЕЧЛдаги биринчи ўйинда асосий таркибда майдонга тушди. Тан олиш лозим, ўша оқшом у яхши ўйнади, аммо жамоаси "Бавария"га 0:1 натижаси билан енгилди. Бир ҳафтадан сўнг "Бавария" билан яна бир ўйин, Жаъфар асосий таркибда, бироқ натижа 0:3! Бундай стартдан сўнг Ирисметовга бўлган ишонч кескин камайиб кетди.

Кўп ўтмай, Лондоннинг "Арсенал"и билан баҳс. Романцев ўйини чиқмаётганига қарамай, бу сафар ҳам Ирисметовни асосий таркибда майдонга ташлади. Яна мағлубият ва яна голсиз "матч". "Спартак" аъзолари ўша куни Олег Романцевнинг: "Нима учун Жаъфарга тўп узатмаяпсизлар?", деб бир неча бор бақирганини эшитади, аммо бунга ҳеч ким эътибор бергани йўқ. "Ўша пайтлари бунга эътибор бермадим, аммо ёшим катта бўлгач тушундим. Мен янги жамоамда бегона эдим. Ҳеч кимни танимаганим, дўстлашишга улгурмаганим панд берди",- деб хотирлайди ҳужумчи.

Кейинроқ, Жаъфар "Лион"га қарши ўйинда ҳам майдонга тушди. РПЛда 8 та баҳс ўтказди. Ёзда умуман қайдномаларга ҳам киритилмай қолди. 12 ўйин 0 гол! Ҳеч ким Ўзбекистондан келган форварддан бундай статистика кутмагани аниқ. Мураббийлар штаби ОАВга Ирисметов руҳан анча тушкун кайфиятда эканлигини уқтиришга уринди. Ачинарлиси шундаки, футболчи ўзига яна бир имконият беришини илтимос қилади. Бу масалада суҳбатлашиш учун бир неча бор Романцевнинг олдига борган, бироқ ҳар сафар мураббий уни клуб техник директори Александер Шикуновга рўбарў қилаверган.

"Жамоага керак эканлигимни исботлаш мақсадида Шикунов билан суҳбатлашдим. У мени шунчаки ЕЧЛда реклама қилиб, кейин катта пулга сотиб юбормоқчи бўлишганини тан олди. "Спартак" Россия чемпионатида менга ишонч билдиргани йўқ. Иккинчи имкон берилмади. 3 йилдан кейин харид қилинган Кавенагини гол киритишини 1 йил кутишди, аммо менга иккинчи "шанс" тақдим этишгани йўқ. Шунчаки "чопиб ташлашди".

Ёқимсиз якун

Ёзда клуб ўзбекистонлик футболчи билан хайрлашди. Жаъфар аввалига Беларусда, кейин "Анжи"да тўп тепди. Кейинроқ, Қозоғистон ва Ўзбекистон чемпионатларида ҳаракат қилди. У "Спартак"дан бошқа барча жамоада супер тўпурарлигини исботлади. 2012 йил якунида унинг ҳисобидаги голлари сони 239 тани ташкил этди. Бунинг учун ҳужумчига 428 ўйин кифоя бўлган. 2013 йилда қаҳрамонимиз бутсаларини михга илди. Ҳозирда у "Пахтакор" клубининг спорт директори саналади.

Яхёхўжа Улуғхўжаев таржимаси