Рустам Турдимуродов: "Бутун жамоада шундай мотивация бор эди"

15 июнь куни “Андижон” Қаршида “Қизилқум” билан беллашди. Меҳмонлар учун ўйин яхши бошланмади. Чунки иккита гол ўтказишди ва бир футболчиси майдондан четлатилди. Бироқ меҳмонлар ҳужумчиси Рустам Турдимуродов катта саҳнага чиқиб 2:0 ни 2:2 га ўзгартира олди. У дублга эришиб жамоасига катта фойда келтирди. Якунда эса учрашув 3:3 билан якунланди.

- Рустам, "Қизилқум"га қарши учрашув драматик тарзда кечди. Қайд этилган 3:3 ҳисоби ҳақида нима дея оласиз? Умуман, учрашув борсидаги фикрларингиз.

- Ассалому алайкум. Аввало, барча мусулмонларга Қурбон хайити муборак бўлсин. Ўйин кутилганидек қийин бўлди. Биз характер кўрсатдик, деб ўйлайман. Буни ҳисоб ҳам айтиб турибди. Охиригача курашган жамоамиздаги барчага катта раҳмат.

- Сиз дублга эришдингиз. Рости, иккита гол уришингизни кутганмидингиз?

- Йўқ, кутмагандим. Лекин ҳеч бўлмаганда битта гол уриш ниятим бор эди.

- “Андижон” 2:0 ҳисобидаги мағлубиятдан қутулиб кетди ва ҳатто баҳс охирида 3:2 ни 3:3 га айлантиришга эришди. Жамоа бир футболчи кам бўлиб қолгач, қаердан куч топди?

- Бу жамоани яхши шаклланганлигини билдиради. Шахсан менда майдондан четлатилган Илҳом Абдуғаниев учун ҳам ўйнашимиз керак, деган мотивация пайдо бўлди. Табиийки, бутун жамоада ҳам шундай мотивация бор эди.

- Ҳакамлик мавзуси асосий планга чиқди. Бу хусусида фикрингиз қандай?

- Ҳакамлар нимани лозим топишса шуни қилади ва биз унинг қарорини ўзгартира олмаймиз. Тортишганимизнинг фойдаси йўқ.

- Мураббий танаффус чоғида ўйинни ўзгартириш учун қандай кўрсатмалар берди?

- Бу сир бўла қолсин.

- Ўйиндан бир кун олдинги машғулотда ҳам голлар ургандингиз. Асосий баҳсда ҳам гол уришингизни ҳис қилишингиз қийин бўлмагандир-а?

- Ўйинолди машғулотда ўзингизга ишонч ҳис қилсангиз ўйинда осонроқ бўлади, деб ўйлайман. Ҳар бир вазиятдан максимум фойдаланишга ҳаракат қилдим.