Рустамжон Ашурматов билан Кореядаги ҳаёти, терма жамоа ва бошқа долзарб мавзуларда суҳбат

Жанубий Корея чемпионатида фаолият олиб бораётган Рустам Ашурматов бизни қизиқтирган саволларимизга жавоб берди.

- Авваламбор, хориждаги ишларингиз ва карантинни қандай ўтказаётганингизни гапириб берсангиз.

- "Гвангжу" клубидаги ишларим жой-жойида давом этмоқда. Бу ерда, машғулотлар деярли тўхтатилмади ва клубим билан ишлашда давом этдик, лекин машғулотлардан ташқари, карантинни асосан уйда ўтказаяпман. Кўпроқ вақтим турли кинолар кўришга кетмоқда.

- "Ульсан" клубига қарши учрашувда заҳирада қолдингиз. Бунга сабаб нима?

- Аниқ бир сабабини билмайман, бу мураббий қарори. Рамазондан кейин, дам олиш имконини берди, деб тушундим. Қолган учрашувларда асосий таркибда ўйнашимга умид қилиб қоламан.

- Фаолиятингиз давомидаги ўзингиз учун бўлган энг яхши ва энг ёмон учрашувни кўрсата оласизми?

- Мен учун ҳар бир баҳс муҳим. Сабаби, барча беллашувларга ўзига яраша меҳнат сарф қилинади.

Вьетнамга қарши қор остидаги финал учрашуви энг яхшиси бўлса, энг ёмони Осиё ўйинлари чорак финалида Жанубий Корея билан бўлган ўйин.

- Мухлислар орасида Рустам Ашурматов тоғаси Бахтиёр Ашурматов орқали футболга кириб келган, деган гап юради...

- Футболга ҳамма қатори кириб келганман. Асосан, бобом сабабли, лекин ҳозирги даражага чиқишимга тоғамнинг ёрдами бор.Тўғри йўл танлашимга маслаҳатлари билан ёрдам берганлар. Болалигимда футбол кийимлари олиб бериб, шу ўйинга қизиқтирганлар. Ҳаётимда уларнинг ўрни жуда катта!

- Қайси клуб мухлисисиз ва кумирингиз ким?

- "Реал" ва Серхио Рамос.

- Жанубий Кореяда қанча вақт қолмоқчисиз?

- Бу йил шартномам тугайди. Аниқ жавоб беролмайман. Балки қоларман, балки жамоамни ўзгартирарман. Бу ҳозирча номаълум. Карантин бўлиб, чемпионатлар тўхтатилгани учун ҳам аниқ таклифлар йўқ. Менимча, яхши савияда ўйнаб турсам, йилнинг охирида таклифлар пайдо бўлади.

- Футбол учунмас, пул учун Кореяга кетган ўзбек футболчилари борми? Нима деб ўйлайсиз?

- Ҳозир К Лигада фаолиятини олиб бораётган ўзбеклар орасида йўқ. Агарда, пул учун бўлганида, Малайзия ва шунга ўхшаш мамлакатларда фаолият олиб бораётган бўлишарди.

- Жанубий Корея футболининг Ўзбекистон футболидан фарқини нималарда кўрдингиз?

- Футболдаги шароитларда ҳар бир деталга алоҳида эътибор қаратишади. Албатта, бунинг барчаси маблағ талаб қилади. Шу қаторда, корейсларда футбол бироз тезроқ.

- Ўзбекистон футболига нима етишмайди?

- Менимча, реклама.

- Терма жамоага қайта бош мураббий бўлган Вадим Абрамов ҳақида фикрингиз?

- Ижобий! Футболни яхши тушунади ва майдонда футболчиларга эркин тўп суриш имконини бериши билан ажралиб туради.

- Фаолиятингиз давомида қайси мураббийдан кўпроқ футбол сир-асрорларини ўргангансиз ва энг кучлиси қай бири?

- Энг кўп нарсани Сергей Лушандан ўргандим. Сабаби, бошқаларга қарагандан мен билан кўпроқ вақт мобайнида ишлаган. Энг кучли мураббий борасида эса, аниқ бир нарса дейишим қийин.

- Терма жамоанинг асосий таркибида ҳимоя марказида ким билан шерик бўлиб, тўп суришни истайсиз?

- Достон Турсунов билан.

- Турсунов билан алоқаларингиз ва муносабатингиз яқин бўлгани учунми?

- Йўқ, майдонда бир-биримизни яхши тушунганимиз учун.

- Масалан, "Насаф", "Навбаҳор", "Бунёдкор" ва "Локомотив" каби клублар К Лигада қатнашганида совринли ўринлар учун кураша олган бўлармиди?

- Буни ҳеч қачон била олмаймиз, нимадир дейишдан йироқман. Сабаби, бу ерда деярли фаворит бўлмайди. Қайси жамоа ғалаба қозонишини аввалдан айтиб бўлмайди.

- У ерда юртимиз футболи ҳақида қанчалик билишади?

- Терма жамоамизни жуда яхши билишади, аммо клубларимизни деярли билишмайди.

- Футболчиларимиздан кимларни танишади?

- Асосан, Кореяда тўп суриб кетган Гейнрих, Жепаров каби футболчиларни эслашади ва шу қаторда, Одил Аҳмедовни ҳам жуда яхши билишади.

- Хитой чемпионати орқалими?

- Йўқ, терма жамоамиз орқали.

- Фаолиятингиз давомида келишилган ўйинларга гувоҳ бўлганмисиз?

- Йўқ! Мен шу пайтгача фаолиятимни "Бунёдкор" ва "Гвангжу"да ўтказдим. Ушбу клубларда бундай ҳолатларга дуч келмаганман.

- Асосий мақсадингиз қандай?

- Албатта, яқин йиллар ичида Европада тўп суриш.

- Бунга қандай эришмоқчисиз?

- Бу фақатгина ўйинларимга боғлиқ. Насиб қилса, бунга эришаман, шахсан ўзим бунга ишонаман.

- Кўплаб мухлисларни легионерларимиз қандай шароитларда ҳаёт кечиришаётгани ва қандай қулайликларга эга эканлиги қизиқтираётган экан. Бу борада ҳам маълумот берсангиз.

- Шукурки, шароитим яхши. Жамоам менга алоҳида уй ва автомобиль берган. Яшашдан муаммо йўқ.

Шуни қўшимча қилишим мумкинки, ишчи ёки талабалардан фарқли равишда ўз оиламизни бу ерга чақириш ҳуқуқимиз бор, бошқаларда эса бундай имтиёз йўқ. Бу фақат Кореядаги ҳолатга тегишли.

- Қайси русумдаги автомобилни беришган?

- Хюндай Туксон берилган.

- Қачон турмуш қурмоқчисиз?

- Агар имконини қилолсак, шу йилнинг охирларига режалаштиряпмиз.

- Сизга жамоадош бўлган футболчилардан рамзий терма жамоа тузиб бера оласизми?

- Ҳа, албатта. Дарвозада Мурод Зуҳуров, ҳимоячилар Акмал Шораҳмедов, Хайрулла Каримов, Юрица Булят, Акром Комилов, ярим ҳимоячилар Отабек Шукуров, Минори Сато, Жавлон Иброҳимов, ҳужум учлигида эса Забиҳилло Ўринбоев, Достон Ҳамдамов ва Элдор Шомуродов.

- Агар, терма жамоа сизнинг ихтиёрингизда бўлганида, ҳозирги пайтда асосий таркиб қандай кўринишда бўларди?

- Элдор Суюнов, Хожиакбар Алижонов, Достон Турсунов, Егор Кримец, Фаррух Сайфиев, Отабек Шукуров, Азиз Ғаниев, Одил Аҳмедов, Жалолиддин Машарипов, Достон Ҳамдамов ва Элдор Шомуродов.

Шу қаторда, яна кўплаб футболчиларимизни ёдимиздан чиқармаслигимиз керак. Масалан, Жамшид Искандеров, Одил Ҳамробеков, Остон Ўрунов, Икром Алибоев каби истеъдод эгалари кўп.