Салоҳга ворис топилди, лекин уни олиш осон эмас

The Athletic нашрининг хабар беришича, “РБ Лейпциг” қанот ҳужумчиси Ян Диоманде ёзги трансфер ойнасида “Ливерпуль”нинг асосий нишонларидан бирига айланган.

Маълум қилинишича, Германия клуби 19 ёшли футболчини яна камида бир мавсум жамоада олиб қолишни истамоқда. Бироқ 87,2 миллион фунт стерлингдан юқори таклиф тушса, трансфер шу ёзнинг ўзида амалга ошиши мумкин.

Хабарда айтилишича, Кот-д’Ивуар терма жамоаси аъзосини қўлга киритишда “Ливерпуль” қулай ҳолатда турибди. Футболчига шунингдек Франциянинг амалдаги чемпиони “Пари Сен-Жермен” ҳам қизиқиш билдирмоқда.

“Ливерпуль” клубни тарк этадиган Муҳаммад Салоҳнинг ўрнини тўлдириши керак. Шу боис клуб скаутлари Диоманде ўйинларини узоқ вақтдан буён диққат билан кузатиб келаётгани таъкидланмоқда.

19 ёшли футболчи жорий мавсумда барча мусобақалар доирасида 36 та учрашувда майдонга тушиб, 13 та гол урди ва 10 та голли узатмани амалга оширди.

Ҳисоботда таъкидланишича, бош мураббий Арне Слот жамоаси ёзда айниқса қанот ҳужум чизиғини кучайтиришни режалаштирмоқда.

Шу сабабли Ян Диоманде ҳозирги трансфер бозорида энг талабгир ва энг кўп муҳокама қилинаётган ёш иқтидорлардан бири сифатида кўрилмоқда.