Самбочиларимиз Осиё чемпионатида 40 та медални қўлга киритишди

Ислом Каримов номидаги Ҳалқаро Аэропортда Деҳли шаҳрида (Ҳиндистон)  ўтказилган Самбо ва жанговор Самбо бўйича Осиё Чемпионатидан қайтиб келган спортчиларимизни кутиб олишга бағишланган тантанали тадбир бўлиб ўтди. Спортчиларимизни тантанали мусиқа садоси остида Ўзбекистон Республикаси Ички ишлар вазирлиги ходимлари гуллар, байроқлар ва олқишлар билан кутиб олишди.

Спортчиларни кутиб олишда уларнинг мураббийлари, қариндошлари, мухлислар ва ОАВ вакиллари иштирок этишди.

Ўзбекистон Самбо Ассоциацияси Президенти А.Алимов спортчиларни, уларнинг мураббийлари ва қариндошларини эришган муваффақиятлари билан қутлаб, мамлакатимиз раҳбари томонидан спортга қаратилаётган эътибор ўз меваларини бера бошлаганлигини ва Ўзбекистон спортчиларининг муваффақиятлари билан фахрланишини таъкидлади!

2019 йилги Самбо бўйича  Осиё Чемпионатида Ўзбекистон Республикаси спортчилари жами 40 та, шу жумладан 23 та олтин, 11 та кумуш ва 6 та бронза медалини қўлга киритишди. Мусобақалар жорий йилнинг 13 - 15 сентябрь кунлари бўлиб ўтди.

Самбо ва жанговор Самбо бўйича Ўзбекистон миллий терма жамоаси умумий жамоа ҳисобида биринчи ўринни эгаллади.

Мусобақаларнинг барча ғолиблари ва совриндорларини, шунингдек, Ўзбекистон Самбо Ассоциацияси раҳбариятини ҳамда мураббийлар штабини 2019 йилги Самбо бўйича  Осиё Чемпионатидаги ёрқин чиқишлар билан табриклаймиз!

Ўзбекистон Самбо Ассоциацияси матбуот хизмати.