Samvel Babayan: "Navbahor" bilan muvaffaqiyatga erishmaguncha Namangandan hech qayoqqa ketmayman"

O‘zbekiston Superligasining 4-turidan o‘rin olgan “Navbahor” – “Surxon” (2:2) uchrashuvidan keyingi matbuot anjumanida "Navbahor"  bosh murabbiyi Samvel Babayan ishtirok etib, OAV xodimlarining savollariga javob berdi.

Samvel Vyacheslavovich odatdagidek, o‘z so‘zini  o‘yin haqidagi fikrlari bilan boshladi.   

- Assalomu  alaykum! Barchaga xayrli kun! Aslida mazkur matbuot anjumanida boshqacha kayfiyat yuzaga kelishi lozim edi. Afsuski, bugungi raqibimizni mag‘lubiyatga uchratolmadik hamda durang natijani qayd etdik. Ta’kidlash joizki, bu yilgi chempionat o‘yinlari oson o‘tmayapti. Istalgan raqibdan kuchli qarshilik kelib chiqmoqda. Masalan, “Bunyodkor” bilan bahs biz uchun og‘ir kechgandi. Bugun “Surxon”ga qarshi kechgan o‘yinda ham katta qiyinchilikka duch keldik. O‘z navbatida aytish mumkinki, chempionat saviyasi ham ortdi, shuningdek, sifatli futbolchilar ham ko‘payib boryapti. Himoyadagi xatolarimiz evaziga o‘z darvozamizdan 2 ta to‘p o‘tkazib  yubordik. Masalan, to‘p yon chiziqdan o‘yinga kiritilgan vaziyatda yaqqol xatoga yo‘l qo‘ydik, raqib gol urib ketdi. So‘nggi daqiqalargacha kurashdik. Agar o‘sha oxirgi vaziyatda Jokich gol urganida bu haqiqiy kambek, balki bayram ham bo‘lardi.

Yigitlarga tanaffusda mazkur o‘yinda ijobiy natija qayd eta olsak, demak, bizda bir jamoa, kollektiv bor, biz bir oila ekanligimiz va o‘z maqsadimiz  uchun kurashishga qodirligimizni isbotlaymiz, degandim. G‘alaba qozonishga esa ozgina omad etishmadi.

Muxlislar bizni oxirigacha qo‘llab-quvvatlashdi, buning uchun ularga rahmat aytaman. Ishqibozlarga bugungi o‘yinda g‘alaba taqdim etmoqchi edik. Biroq ba’zi omillar sababli, bunga erisha olmadik. Endi ortda qolgan bahslarni yaxshilab tahlil qilgan holda, keyingi o‘yinlarga puxta tayyorgarlik ko‘ramiz.  

Bugun 4-tur bahslari nihoyasiga etdi va barcha jamoalar ochko yo‘qotdi. Chempionat esa shunisi bilan qiziq. 

- Chempionlikni maqsad qilgan jamoa to‘rtta turdan so‘ng, 6 ochko jamg‘arishi yaxshi holat emas. Buni qanday izohlaysiz?

- Shu savolni juda kutgandim. Bilasizmi, futbolda jamoa muvaffaqiyatiga sabab nima? To‘g‘ri mudofaa, kuchli himoya. Bizga himoya chizig‘ida Milosh Milovich, Igor Golban kabi futbolchilar etishmayapti. Ular jamoamizni tark etishdi, o‘rinlariga munosib transfer qila olmadik. Gol uryapmiz, ammo o‘z darvozamidan to‘p ham o‘tkazib yuboryapmiz. Bizda mudofaa bo‘yicha kamchiliklar ko‘zga tashlanyapti.

- Zaxiralarni ko‘p amalga oshirmaysiz, ba’zan almashtirishlar juda kech amalga oshadi. Buning sababi nima?

- Bizda teng kuchli ikkita tarkib yo‘q. Asosiy tarkibga munosib deb hisoblayotganlarimiz 12 nafarni tashkil etadi, qolgani esa yosh futbolchilar. Nikabadzeni o‘yinning borishidan kelib chiqib, maydonga tushirmadim. Chunki uchrashuvdagi temp o‘ta yuqori edi, birdaniga uni maydonga tashlab, o‘yinga qo‘shilib ketgunicha tavakkal qilishga fursat yo‘q edi. Farrux Sayfiev terma jamoada o‘ynab qaytdi, charchoq bo‘ladi. Azimjon Ahmedov jamoa sardori, bugun u gol urdi, o‘zining etakchilik qobiliyatini namoyish etdi.

Aytish lozimki, endigina 4 ta tur baxslari ortda qoldi va vaziyatni o‘nglash uchun hali bizda imkoniyat  bor.

Kezi kelganida yana shuni ham ta’kidlash joizki, “Navbahor”da faoliyat yurita boshlaganimdan buyon jamoa bir qator yutuqlarga erishdi, sovrinlarni qo‘lga kiritdi.

Yana rasman shuni ta’kidlamoqchimanki, “Navbahor” bilan  muvaffaqiyatga erishmagunimcha, Namangandan hech qayoqqa ketmayman.

Jamoa sifatli o‘yin namoyish etmoqda va muvaffaqiyat qozonish uchun biroz vaqt kerak.

“Navbahor”dagi kamchiliklarni aytib o‘tdim. Bu zaxiramiz va jamoaga yangi qo‘shilgan o‘yinchilarning jamoa o‘yiniga kirishib ketishlari uchun biroz vaqt kerakligi bilan bog‘liq. Shular amalga oshsa, jamoamiz ijobiy natijalarni qayd etishga qodir bo‘ladi.