Самвел Бабаян "Навбаҳор"нинг муҳим ғалабасидан сўнг нималар деди?

Ўзбекистон Суперлигаси 21-туридан ўрин олган "Навбаҳор" - "Динамо" учрашувидан (2:0) сўнг мезбонлар бош мураббийи Самвел Бабаян матбуот анжуманидаги қуйидаги фикрларни билдириб ўтди:

"Хайрли кеч! Навбатдаги ўйинни ҳам ўтказиб олдик. Исталган вазиятда бизни қўллаб-қувватлаб турган ишқибозларимизни ғалаба билан табриклайман. Шогирдларим бугун 3 очкони қўлга киритиш учун майдонда борини берди. Олдимизда 5 та баҳс қолди, ҳаракат қилишда давом этамиз. Нимага қодирлигимизни кўрсатиш учун ҳаракат қиламиз.
Худога шукур, бугун барча ўзига билдирилган ишончни оқлади. Айниқса, ёш тарбияланувчимиз ўзини яхши томондан кўрсатди. Ёшларга имконият қаратишда давом этаверамиз, ушбу беллашувда бу ҳолат ўзини оқлади".

- "Навбаҳор"нинг чемпионлик учун имкониятлари қандай? Бу борада қандай стратегия ишлаб чиқилган? Чунки 1-таймда потенциал кўрмадик, 2-бўлимда эса жонланиш бўлди.

"Келинг, сўнгги савол ҳақида гаплашамиз. Учрашувни таҳлил қилсак, вазиятлардан фойдаланишда оқсадик. Ҳар битта ўйинда етарлича вазият яратмоқдамиз. Чемпионлик ҳақида гапирадиган бўлсак, биз ҳар битта беллашувда ўз потенциалимизни намойиш этишга ҳаракат қиляпмиз. Бугун шунинг уддасидан чиқдик. Олдинда яна 5 та ўйин бор. Рақибларимиз ҳақида умуман ўйламаймиз. Ҳали ечишимиз керак бўлган муаммолар бисёр".

- "Сўғдиёна" сўнгги ўйинларда стабиллик кўрсата олмаяпти. Кубок жиззахликлар учун охирги чора бўлиб қоляпти. Бўлажак баҳсдан нимани кутяпсиз?

"Биринчидан барчани ҳурмат қилишимиз лозим. Улар юртимиз шарафини халқаро майдонда ҳам ҳимоя қилди. Ярим финал босқичида ҳам фақат ғалаба учун майдонга тушамиз. Мавсум аввалида ҳам айнан шуни режа қилгандик. Бизни жуда муҳим учрашув кутиб турибди. Унга муносиб тайёргарлик кўришга ҳаракат қиламиз. Қайтараман, биз рақибнинг эмас, ўзимизнинг ўйинимизга эътибор қаратишимиз керак. Муаммоларимиз ўзимизга етарли. Уларни ҳал қилиш билан шуғулланамиз".