Sanjar Shoahmedov nega Malayziyaga ketdi?

Yangi mavsumdan boshlab Malayziya chempionatiga ko‘chib o‘tgan hamyurtimiz Sanjar Shoahmedovni ham endi kuzatishda davom etamiz. «Lokomotiv»dagi ajoyib o‘yinlari orqali muxlislarning ishonchini qozongan yarim himoyachi Malayziyaga O‘zbekiston chempioni sifatida taklif etilganligi ham e’tiborga molik. Shu tariqa, Shoahmedovning Malayziyadagi faoliyati boshlandi. U «Terenganu» jamoasi bilan kelishuvga erishgan holda o‘zi uchun yangi chempionatdagi faoliyatini boshladi. Aslida esa Sanjar bundan ham saviyasi kuchliroq bo‘lgan chempionatga to‘p surishga munosib edi. Ammo u o‘z tanvolini qabul qildi va Malayziyani tanlashga qaror qildi. Shu sababli kuni kecha Shoahmedov bilan bog‘lanib, nima uchun ushbu chempionatga ko‘chib o‘tganining sabablarini bilishga qiziqdik va shu orada yana boshqa masalalarga ham to‘xtalib o‘tdi.

“Malayziyalarga va’da berib qo‘ygandim”

- “Lokomotiv” jamoasi bilan tuzgan shartnomam 2018 yilning dekabr oyida tugagandi. Malayziyaliklar esa menga o‘tgan yilning sentyabr oyidan beri qiziqish bildirishayotgandi. Ayniqsa, oktyabrdan boshlab menga Malayziyaning ikki-uchta klubidan aniq shartnomalar taklif qilinayotgandi. Natijada ularning takliflari jiddiy bo‘lgani sababli Malayziya klubi bilan muzokaraga kirishdik. U erdagi yaratilgan shart-sharoitlar bilan yaqindan tanishdik. Ikkala tomonning taklif va sharoitlar bir-birimizga ma’qul kelganidan keyin malayziyaliklar bilan shartnoma tuzishga qaror qildim.

“Menga Janubiy Koreya va Erondan ham takliflar bo‘lgandi”

- Boya aytganimdek, bu jamoa bilan oktyabr oyida gaplashib, ularga oldindan lafz berib qo‘ygandim. Ular bilan kelishib qo‘yganimdan so‘ng oldimda yana yangi variantlar paydo bo‘la boshladi. Misol uchun Janubiy Koreya va Erondan ham takliflar kelib tushgandi. Shunchaki, men malayziyaliklarga ertaroq o‘z va’damni berib qo‘yganim bois lafzimni buza olmadim. Natijada boshqa mamlakatlarning takliflariga rad javobini berishga majbur bo‘ldim.

“Ota-onam ham yana legioner bo‘lib o‘ynashimni istashgandi”

- “Lokomotiv” tarkibida ancha-muncha yutuqlarga erishdik. O‘zbekiston chempioni bo‘ldik, Kubok sohibiga aylandik. Osiyo Chempionlar ligasida ham munosib o‘yinlar ko‘rsatdik. Bemalol ayta olamanki, “Lokomotiv” safida o‘ynab ancha o‘sishga erishdim. Yana bir bor legioner maqomi ostida faoliyatimni davom ettirishni xohladim. Ota-onam ham mening chetda o‘ynab kelishimni istashayotgandi. Shuning uchun boshqa mamlakatga ketdim. Lekin “Lokomotiv”dagi faoliyatim men uchun unutilmas bo‘lib qoladi. Malayziya jamoasiga o‘tishimda ham “Lokomotiv”ning katta hissasi bor.

“Malayziyaliklarga o‘zbekistonlik futbolchilar yoqadi”

- Malayziya chempionatiga nima chorlayapti? Menimcha, o‘zbekistonlik futbolchilar malayziyaliklarga yoqadi. Balki bu erda o‘zbekistonlik futbolchilar o‘zlaridan yaxshi taassurot qoldirib, natija ko‘rsatishgan bo‘lsa, shuning uchun Malayziya klublari bizning o‘yinchilarga qiziqishayotgandir. Ular meni ham shu maqsadda taklif qilishgan.

“Bu erda futbolchilarga yaxshi maosh to‘lashadi”

- To‘g‘ri, O‘zbekistonda “Lokomotiv” klubi o‘z o‘yinchilariga yaxshi maosh to‘laydi. Bu erda ham futbolchilarga salmoqli darajada maosh to‘lashadi. Hamma o‘zining sharoitidan kelib chiqib harakat qiladi. Futbolchi o‘ziga kelgan yaxshi imkoniyatdan foydalanib qolishga intiladi. Masalan, menga Malayziya klubi tomonidan bildirilgan taklif har tomonlama ma’qul keldi. Masalan, u erda muxlislarning ham futbolga qiziqishi katta. Bu erda marketing ishlari ham yaxshi yo‘lga qo‘yilgan.

“Stadionlarga 30-40 ming muxlis kelayotgani meni ajablantirdi”

- Meni Malayziyada ajablantirgani bu birinchi navbatda tomoshabinlarning stadionlarga kelishi bilan bog‘liq. Bu erda ishqibozlik darajasi juda yuqorligi meni ajablantirdi. Bitta o‘yinga 30-40 ming atrofida muxlis keladi. Malayziya chempionatiga kelib o‘ynayotgan futbolchi sifatida shuni aytishim kerakki, bu erda to‘p surishingiz uchun jismoniy tomondan ham ancha baquvvat bo‘lishingiz talab etiladi. Malayziya chempionatida futbol tez. Bu erda Ispaniya, Angliya, Argentina kabi chempionatlardan legionerlar kelib o‘ynashyapti.

“Lokomotiv”dan ko‘p narsalarni o‘rgandim”

- “Lokomotiv”da o‘ynab nimadir o‘rgandim. Baribir “Lokomotiv” O‘zbekistonning top-klubi edi. Olmaliqdan kelganimda bu jamoa chempionlik uchun kurashayotgan, katta maqsadi bor jamoa edi. Shu bois bunday klubda to‘p surish orqali futbolchi sifatida ancha-muncha narsalarni o‘rgandim. Ko‘pni ko‘rgan o‘yinchilar bilan o‘ynash yanada maroqli bo‘ldi. Misol uchun Timur Kapadze, Server Jeparov, Jasur Hasanov, Ignatiy Nesterov kabi futbolchilardan ham ko‘p narsalarni oldim.

“Terma jamoada o‘ynaymanmi? Murabbiylar hal qilishadi”

- Terma jamoada o‘ynash yoki o‘ynamaslikni murabbiylar hal qilishadi. Men esa qo‘limdan kelganicha harakat qilaman. Bu – hayot va to‘xtab qolmaydi. Malayziya chempionatida o‘ynaymanmi yoki boshqa chempionatdami, muhimi men o‘z o‘yinimni ko‘rsatishga harakat qilaveraman. Qolganiga esa murabbiylarimizning o‘zlari baho beraveradilar.

“Malayziya chempionatidagi hamma klubning maqsadi bitta”

- “Terenganu” jamoasining maqsadlari katta. Biz Malayziya Kubogini qo‘lga kiritish va ichki musobaqada chempionlikni qo‘lga kiritish uchun kurashyapmiz. Meni yana bir hayron qoldirgani shu bo‘ldiki, Malayziya Superligasida 12 ta jamoa qatnashayotgan bo‘lsa, hamma jamoaning maqsadi bir xil ekan. Hammasi o‘z oldiga 1-o‘rin va Kubokni qo‘lga kiritishni o‘z oldiga asosiy maqsad qilib qo‘yishar ekan.