Европанинг энг кучли жамоаси аниқланади ёхуд ТОП-5лига старти олдидан Суперкубок учун баҳс (превью)

Европада мавсум анъанавий равишда УЕФА Суперкубоги учун ўйин билан бошланади. Соврин 1972 йилдан бери ўйнаб келинмоқда ва бундай иштирокчилар жуфтлиги илгари ҳеч қачон бўлмаган. Парижликлар учун бу УЕФА Суперкубогини қўлга киритиш учун эндигина иккинчи имконият.

Биринчи уриниш улар 1996 йилда "Кубок эгалари" кубогини қўлга киритгандан сўнг бўлган эди. Ўшанда ғолиб икки беллашув натижасига кўра аниқланарди. Рақиб Туриннинг "Ювентус" клуби бўлиб, ПСЖ ўз майдонидаги дастлабки ўйинда 1:6 ҳисобида мағлуб бўлди. Туриндаги ўйин шунчаки расмият учун ўтказилгандек бўлди, аммо ўшанда ҳам туринликлар 3:1 ҳисобида ғалаба қозонди.

"Тоттенхэм" учун буларнинг барчаси илк бор юз бермоқда. 1963 йилда улар ҳам Кубок соҳибига айланган эдилар, бироқ Суперкубок учун баҳс 1973 йилдан бошлаб ташкил этилган. Жамоалар 2017 йилда Халқаро Чемпионлар Кубоги мавсумолди турнирида фақат бир марта ўзаро тўқнаш келган. Ўшанда инглизлар 4:2 ҳисобида ғалаба қозонган.

Ҳозирги жамоалардаги футболчилардан фақат ПСЖ сардори Маркиньос ўша учрашувда таркибда эди. Ўшандан бери таркиблар бутунлай ўзгариб кетган. ПСЖнинг мавқеи ҳам ўзгарган. Илгари жамоа фаворитлар қаторига киритилса-да, бирор муҳим ғалабага эриша олмаган эди. Ҳозир эса уни деярли дунёдаги энг кучли жамоа деб аташмоқда.

Дунёнинг энг яхши жамоаси мақомини Клублар ўртасидаги жаҳон чемпионати финалида ғалаба қозониш орқали расман қўлга киритиш мумкин эди, бироқ Луис Энрике жамоаси кутилмаганда "Челси"га имкониятни бой берди.

Умуман олганда, ПСЖни Англия Премьер-лигаси клублари устидан ғалаба қозонишга ихтисослашган жамоа деб ҳисоблаш мумкин. Чемпионлар лигасида парижликлар кетма-кет "Манчестер Сити", "Ливерпуль", "Астон Вилла" ва "Арсенал"ни мағлуб этишга эришдилар.

КЎЖЧ финалидан сўнг парижликлар таътилга чиқиб, бирорта ҳам ўртоқлик ўйинини ўтказмади, шунинг учун футболчиларнинг қандай ҳолатда эканлигини аниқлаш мушкул. Бироқ, жамоанинг асосий афзаллиги унинг ўйинчиларининг бир-бири билан ўйнаб ўрганганлигидир. Трансфер бозорида клуб Европанинг кўплаб жамоаларига нисбатан унча фаол эмас ва бу ҳам таркибнинг тўлиқ шаклланганлиги билан боғлиқ.

Марказий ҳимоячи масаласи бир неча кун олдин ҳал бўлди. "Борнмут"дан 65 миллион евро эвазига Украина терма жамоаси аъзоси Илья Забарний ўтмоқда. "Лилл"дан 40 миллион евро эвазига Франция терма жамоаси дарвозабони Люка Шевалье сотиб олинди. Уни нафақат Франциянинг, балки Европанинг энг истиқболли дарвозабони деб аташмоқда.

Шубҳасиз, Люка жамоага асосий дарвозабон сифатида келмоқда. Жанлуижи Доннарумманинг шартномаси 2026 йилда тугаса-да, италиялик футболчи аллақачон янги жамоа қидирмоқда.

ПСЖ иштирокидаги сўнгги бешта ўйин натижалари:

• КЎЖЧ. "Челси" - ПСЖ - 3:0
• ПСЖ - "Реал Мадрид" - 4:0
• ПСЖ - "Бавария" - 2:0
• ПСЖ - "Интер Майами" - 4:0
• "Сиэтл Саундерс" - ПСЖ - 0:2.

"Тоттенхэм" Бреннан Жонсоннинг "Манчестер Юнайтед" дарвозасига киритган ягона голи туфайли Европа Лигасини қўлга киритди. Эришилган ғалаба Англия Премьер-лигасида 17-ўринни эгаллашига қарамай, мавсумни муваффақиятсиз деб ҳисобламасликка имкон беради.

Бош мураббий лавозимига "Брентфорд"ни муваффақиятли бошқарган, аммо топ-жамоаларда ишламаган даниялик мутахассис Томас Франк таклиф қилинди. Европа Лигаси финалидаги ғалабдан сўнг "шпорлар" таътилга чиқди ва июль ойининг ўрталарида кетма-кет назорат баҳсларини ўтказишни бошладилар.

Аввалига Англиянинг қуйи дивизион жамоаларига қарши, кейин эса чет элга чиқиб ўйинлар ўтказилди. Нуфузли учрашувлар орасида Гонконг кубогида "Арсенал" устидан қозонилган ғалабани алоҳида таъкидлаш мумкин, аммо сўнгги ўйинда "Тоттенхэм" "Бавария"га йирик ҳисобда енгилди. "Шпорлар" тўпни кўп назорат қилишни ёқтирадиган жамоаларга қарши ўйинларда жуда камдан-кам муваффақиятга эришади. "Бавария" ва ПСЖ айнан шундай жамоалар сирасига киради.

"Шпорлар" таркиби ҳам кучайтирилмай қолмади. Бугунги кунда асосий трансфер "Вест Хэм"дан ўнг қанот ярим ҳимоячиси Муҳаммад Қуддус бўлди. У учун 63,8 миллион евро тўланди. "Бавария"дан ҳимоячи Жоау Палиньяни ижарага олиниб, ҳужумчи Матис Тел сотиб олинди.

Ёш ҳимоячилар - "Кавасаки"дан япониялик Кота Такаи ва "Хайдук"дан хорватиялик Лука Вушкович ҳам жамоага қўшилди. Шу билан бирга, "Тоттенхэм" афсонаси деб аташ мумкин бўлган футболчи, жамоа сардори Сон Хин Мин клубни тарк этди.

"Тоттенхэм"нинг сўнгги бешта ўйин натижалари:

• "Бавария" - "Тоттенхэм" - 4:0
• "Ньюкасл" - "Тоттенхэм" - 1:1
• "Арсенал" - "Тоттенхэм" - 0:1
• "Лутон Таун" - "Тоттенхэм" - 1:1
• "Тоттенхэм" - "Уикомб Уондерерс" - 2:2.

Беллашувни ўтказиб юбориши мумкин бўлган футболчилар

ПСЖ таркибидаги жароҳатлар ҳақида маълумот берилмаган. Луис Энрике асосий таркибнинг барча футболчиларига таяниши мумкин. Инглизларда эса вазият бошқача. Ҳимоячи Раду Драгушин февраль ойида хочсимон боғламидан жароҳат олган ва ҳозиргача даволанмоқда. Янада жиддийроқ йўқотиш эса ярим ҳимоячи Жеймс Мэддисондир. У август ойи бошида худди шундай жароҳат олган. У йил охиригача майдонга туша олмайди.