Sardor Mirzaevning goli ham jamoasini mag‘lubiyatdan saqlab qola olmadi

Tailand chempionatida to‘p surayotgan legionerimiz Sardor Mirzaev bugun “Muangtong Yunayted” tarkibida navbatdagi o‘yinini o‘tkazdi. Bu safar Tay ligasining 13-tur doirasida 2-o‘rinda borayotgan “Chiangray Yunayted”ga qarshi maydonga tushdi.

O‘yinning 5-daqiqasida mezbonlar legioneri Jaja Koelo hisobni ochdi. Birinchi bo‘limning 45+2-daqiqasida hamyurtimiz Sardor Mirzaev jarima maydoni tashqarisidan o‘zining aniq zarbasi bilan hisobni tenglashtirdi. Lekin uning bu goli jamoasini mag‘lubiyatdan saqlab qola olmadi. 67-daqiqada yana o‘sha Koelo penaltidan gol urdi va 2:1 hisobi o‘yin oxirigacha o‘zgarmay qoldi. Mirzaev esa uchrashuvda to‘liq ishtirok etdi.

“Muangtong Yunayted” 11 ta uchrashuvda 16 ochko bilan turnir jadvalida 8-o‘rinni egallab turibdi.