Коронавирус пандемияси туфайли Қатар чемпионати ҳам тўхтатиб қўйилганди. Биласиз, юлдузлар лигасида ҳамюртимиз Сардор Рашидов “Қатар СК” клуби шарафини ҳимоя қилиб келмоқда.

Қатарда бунгача 17 та тур ўтказиб бўлинган ва охирги ўйинлар 7 март куни ўтказилган. Сардор Рашидов тўп сураётган “Қатар СК” эса 6 март куни “Ал Аҳли” майдонида 2:2 ҳисобида дуранг ўйнаганди.

Шундан кейин Қатарда ҳам футболчилар мажбурий танаффусга чиқишганди. Аммо, эндиликда у ерда ҳам футбол учрашувлари яна давом эттириладиган бўлиб турибди.

Бу борада Рашидовнинг Sports.uz сайтига маълум қилишича, чемпионатнинг 18-тур беллашувлари 24 июлдан давом эттирилади. Шу куни “Қатар СК” ўз майдонида “Ал Райян” жамоасини қабул қилади. Сардор эса ўз жамоаси билан машғулотларга жиддий киришган.

Айни пайтда Қатар юлдузлар лигасида Рашидовнинг клуби 12 та иштирокчи орасида 9-ўринни банд этиб турибди. “Қатар СК” ҳозиргача 17 та учрашувда 17 очко жамғарган.