Сардор Рашидов: "Пахтакор"да ҳамма нарса ўзгарган" (интервью)

Ўртоқлик ўйини доирасида "Пахтакор" Қозоғистоннинг "Қайрат" жамоаси билан куч синашди. Жанговор ўтган ўйинда "шерлар" 4:3 ҳисобида рақибдан устун келди.

Учрашувдан кейин Тошкент клуби футболчиси Сардор Рашидов SPORTS.uz сайтига кичик интервью берди. Марҳамат, қуйида батафсил танишиб чиқишингиз мумкин.

- Ассалому алайкум, Сардор ака! Бугунги ўйин ҳақида қандай фикр билдира оласиз?

- Ўйин яхши ўтди. Биринчи навбатда, мухлисларга раҳмат айтмоқчиман. Шундай совуқ ҳавода ҳам бизни қўллаб-қувватлаб туришди. Охирги баҳсларимиз ажойиб ва биз хоҳлагандек ўтмоқда. Биз чемпионатга янада кучлироқ бўлиб қайтмоқчимиз. "Пахтакор" фақат чемпионлик учун курашади ва шуни мақсад қилади. 

- Қайтишингизни бундай гол билан нишонлашингизни кутганмидингиз?

- Очиғи, шунақа ниятим бор эди. Кетишим олдидан ҳам шундай гол ургандим. Қайтишда ҳам шу ҳолат такрорланди. 

- Таркибга кеч қўшилдингиз. Бу жисмоний ҳолат билан боғлиқми?

- Ҳозирча тўлик тикландим, дея олмайман. 70 ёки 80 фоиз жароҳатдан қутулдим.

- "Пахтакор"да нималар ўзгарган?

- Клубда ҳамма нарса ўзгарган. Ўйлашимча, жамоамиз кузда бўлиб ўтадиган Осиё чемпионлар лигасида ҳам муваффақиятли иштирок этади. 

- Узоқдан бугунги каби гол уришнинг қандайдир сири борми?

- Аввало, ҳаммаси Худодан. Биз фақат "гол бўлсин", деб тепамиз, холос (кулади).

- Жамоага ОЧЛда ҳам ёрдам берасизми ёки таклиф бўлса, бошқа жамоага ўтиб кетасизми?

- Бу саволни очиқ қолдирганим маъқул.