Саудия клуби "Реал" юлдузи учун рекорд суммада пул таклиф қилган

Саудия Арабистони чемпионати клубларидан бири "Реал" форварди Килиан Мбаппени ўз сафига қўшиб олмоқчи. Франциялик юлдуз учун саудияликлар катта пул беришга тайёр. Бу ҳақда Defensa Central хабар бермоқда.

Манбага кўра, номи ошкор этилмаган Саудия клуби "қаймоқранглилар"га рекорд даражадаги 350 миллион евролик таклиф билан келган. "Реал" президенти Флорентино Перес Мбаппени шунча пулга ҳам қўйиб юбормаслиги маълум бўлган.

Футболчининг ўзи ҳам фаолиятини Саудия Арабистонида давом эттиришни истамаяпти.

Ўтган мавсумда Килиан Мбаппе Мадрид клуби сафида барча мусобақаларда 59 та ўйинда майдонга тушиб, 44 та гол урган. Шунингдек, унинг ҳисобида бешта ассист мавжуд. Франциялик ҳужумчининг "Реал" билан шартномаси 2029 йилнинг ёзигача мўлжалланган.