Сенегал "CAS"га мурожаат қилади: финал натижаси бўйича баҳс давом этади

Сенегал футбол федерацияси Африка Кубоги-2026 финали бўйича қарор устидан Спорт арбитраж судига апелляция беришини маълум қилди.

Расмий баёнотда федерация ушбу қарорни "адолатсиз" деб атаб, "Сенегал футболининг ҳуқуқларини барча қонуний йўллар билан ҳимоя қилиш" ниятида эканини таъкидлади.

Аввалроқ Африка футбол конфедерацияси Марокаш апелляциясини қаноатлантириб, Сенегал миллий терма жамоасига финалда 0:3 ҳисобида техник мағлубият ёзган ва Марокаш миллий терма жамоасини ғолиб деб эълон қилган эди.

Бу қарорга 98-дақиқада Браим Диасга қарши қоидабузарлик учун белгиланган пенальтидан кейин сенегалликларнинг майдонни тарк этгани сабаб бўлган.

Учрашув 13 дақиқалик танаффусдан сўнг давом этган, Браим пенальтини голга айлантира олмаган ва баҳс Сенегалнинг 1:0 ҳисобидаги ғалабаси билан якунланган эди.