Сенсацион ғалабадан кейин Шомуродовнинг ўйини қандай баҳоланди?

А Сериянинг 26-тури кутилмаган натижа билан бошланди. Юқори дивизиондаги ўрнини сақлаб қолиш учун курашаётган “Специя” ўз мухлислари кўз ўнгида иккинчи поғонада бораётган “Интер”ни 2:1 ҳисобида таслим қилди.

Бу жамоаларнинг аввалги саккизта учрашувидан бирортасида лигурияликлар ғалаба қозона олмаган ва атиги биргина дуранг билан кифояланиб, еттита баҳсда мағлубиятга учраган эди.

Ҳа, бу галги баҳсда ҳам “Интер” ҳақиқий фаворит сифатида эътироф этилган эди. Бироқ, “Специя” футболчилари “жон аччиғи”да кучли рақибни ер тишлатди.

Биз учун муҳими, Элдор Шомуродов янги бош мураббий Леонардо Семпличи қўл остида илк бор бошланғич таркибда майдонга тушди.

Айтиш жоизки, легионеримизнинг А Сериядаги голсиз серияси ҳамон давом этмоқда. Икки марказий ҳужумчидан бири сифатида тўп тепган ҳужумчимиз майдонни яна голсиз тарк этди. Шомуродов Италия чемпионатида охирги маротаба 2022 йилнинг 14 май куни “Рома”нинг “Венеция”га қарши учрашувида рақиб дарвозасини ишғол қилган эди.

“Специя” жамоаси фаолиятини ёритиб бораётган https://www.calciospezia.it сайти учрашувда қатнашган футболчилар ўйинини қуйидагича баҳолади.

ДРАГОВСКИ, 8:

Учрашувнинг бошида жаҳон чемпиони Лаутаро Мартинеснинг 11 метрлик белгидан йўллаган зарбасини қайтариб, жамоаси ғалабасига пойдевор қўйди. Беллашув давомида ҳам аргеналик ҳужумчининг хавфли зарбасини бартараф этди. “Интер” ҳужумчиси Ромелу Лукаку Драговски дарвозасини пенальтидан ишғол қила олди холос.

АМПАДУ 7:

“Специя”нинг тўрт нафар ҳимоячиси орасида энг ишончли ўйнагани бўлди. Эдин Жеконинг дарвозага хавф солишига йўл қўймади. Барча ҳужумларни маҳорат билан бартараф қилди.

КАЛДАРА 6.5:

Калдаранинг Д'Амброзиога қарши ўйини пенальтига сабаб бўлди. Кейинги вазиятларда Ромелу Лукакунинг ҳаракатларини йўққа чиқара олиб, айбини ювди. Шунингдек, Жекога ҳам имконият бермади.

НИКОЛАУ 6.5:

Биринчи пенальти белгиланган вазиятда позицияни хато танлагани панд берди. Бахтига дарвозабон Драговски оро кирди. Беллашувнинг иккинчи ярмида чап қанотгаўтиб, рақибга умуман имконият бермади ва мухлису мураббийлар ишончини оқлади.

АМЬЯН 6:

Ўнг қанотда “Интер”нинг шу куни энг зўр ўйнаган вакили Госенсга қарши турди. Айрим хатоларига қарамай, анча ишончли ўйнади.

АГУДЕЛО 6:

Бу ўйинчи учрашув давомида бир неча бор позицияни ўзгартирди. Биргина хавфли зарбаси билан эсда қолди.

КОВАЛЕНКО 6.5:

Агудело ўрнига майдонга тушган украиналик футболчи ўйинни анча жонлантирди. Айниқса, прессинг қилишда ўзини кўрсатди. Шунингдек, жамоаси учун пенальти ишлаб берди.

БУРАБИЯ 6.5:

Бурабия рақиб плеймейкери Брозовичга қарши ўйнади ва уни ўйиндан чиқара олди. Шунингдек, жамоадоши Зурковскига катта ёрдам берди.

ЗУРКОВСКИ 5:

Зурковскига “Интер” плеймейкери Брозовични “ёпиш” вазифа юклатилганди. Лекин эплай олмади. Семпличи унинг жойига Агуделони ўтказгани ҳам иш бермади. Брозовични Бурабия ўйиндан “чиқарди”.

ЭКДАЛЬ 7:

Иккинчи бўлим бошида Зурковскини ўрнига майдонга тушиб, вазиятни ўз қўлига олди. Ҳимояга катта ёрдам берди. Ақлли ўйин кўрсатди. Майдон марказидаги устунликни таъминлади.

ГЬЯСИ 6:

Чап қанотда одатдагидек фаол ўйнади. Д'Амброзио аксарият вазиятларда ундан ўта олмади. Лекин ҳужумкор футболчи сифатида рақибга ҳеч қандай хавф туғдира олмади.

ФЕРРЕР 5:

81-дақиқада Гьяси ўрнига майдонга тушган Феррер ўз жарима майдончаси ичида Дамфрисга қарши ўйин қоидасини бузди. Пенальтидан унумли фойдаланган Ромелу Лукаку ҳисобни тенглаштирди.

НЗОЛА 7.5:

Жамоанинг асосий тўпурари, деган номни оқлади. Ўйин якунланиши арафасида масъулиятни ўз бўйнига олиб, пенальтини ижро этди ва жамоасининг тарихий ғалабасини таъминлади. Нзола мавсумдаги 12-тўпини киритди.

ШОМУРОДОВ 5:

Содда ўйин намойиш қилиш орқали жамоасининг ҳужумкорлигини оширишга ҳаракат қилди. Бироқ, ҳужумчи сифатида “Интер” дарвозасига хавф сола олмади. Анчадан бери гол ура олмаяпти. Айрим вазиятларда мувозанатни сақлай олмай, тўпни йўқотди. Шу боис, биринчи бўлимдан кейин жойини Мальдинига бўшатиб берди.

МАЛЬДИНИ 7:

Шомуродов ўрнини эгаллаган италиялик ҳужумчи биринчи уринишдаёқ “Интер” дарвозасини ишғол қилди. Мальдини “Интер”нинг азалий рақобатчиси ҳисобланган “Милан” тарбияланувчиси ҳисобланади. Бу гол футболчи учун алоҳида аҳамиятга эга.

СЕМПЛИЧИ 7:

“Специя”ни ҳужумкор жамоага айлантира олди. Ўз вақтида ўйинчиларни тўғри алмаштирди. Тактикани оқилани ўзгартирди. Натижада жамоаси тарихий ғалабага эришди.

Шомуродовга хушхабар!