Сербия президенти: 3-ўрин учун баҳсда Марокашга мухлислик қиламан. Чунки...

Сербия президенти Александр Вучич жаҳон чемпионатининг бронза медаллари учун бўладиган ўйинда кимга мухлислик қилишини айтди.

“Финалда кимни қўллаб-қувватлашни билмайман, лекин учинчи ўрин учун ўйинда қайси жамоага мухлислик қилишни биламан. Бу – Марокаш. Чунки улар ҳеч қачон Косово мустақиллигини тан олмайдиган биродарларимиздир.

Нови-Пазар (аҳолисининг аксарияти мусулмонлар бўлган Сербиядаги шаҳар) мусулмонлар бўлгани учун Марокашга мухлислик қилади деб ўйлайсизми? Улар бизнинг биродарларимиз ва дўстларимиздир”, — деди Александр Вучич RTS телеканалига берган интервьюсида.

Эслатиб ўтамиз, 3-ўрин учун баҳсда Марокаш терма жамоаси Хорватия билан тўқнаш келади. Ўйин бугун, 17 декабрь куни бўлиб ўтади. Учрашув Тошкент вақти билан соат 20:00 да старт олади.