Сергей Фомин Туркияда финал учун курашади

Мамлакатимизнинг иккинчи рақамли теннисчиси Сергей Фомин Туркиянинг Анталия шаҳрида ўтаётган халқаро турнир чорак финалига чиқди.

Сергей мусобақанинг иккинчи даврасида испан теннисчиси Алехандро Манзанерани уч сетда 3:6, 6:2, 6:3 ҳисобида мағлубиятга учратди ва 1/4 финал босқичида италиялик Габриэль Пираинога қарши кортга чиқадиган бўлди.

Жуфтлик баҳсларида Сергей Фомин нейтрал теннисчи Даниил Голубев билан тандем ҳосил қилиб, чорак финалда чехиялик Мартин Крумич ва швейцариялик Жеффри фон дер Шуленбург дуэтини 6:1, 3:6,10:7 ҳисобида таслим қилди.

Энди Сергей ва Даниил италиялик Хуан Мартин Манзано ва испаниялик Алваро Пеиро Серрано жуфтлиги билан рақобатлашади.