Сергей Ковшов: Оғир меҳнат эвазига очко олдик

Бугун Ўзбекистон Суперлигаси доирасида Фарғонанинг "Нефтчи" клуби ўз майдонида Қаршининг "Насаф" жамоасини қабул қилди. Мазкур ўйинда ҳисоб очилмади ва жамоалар бир очкодан "бўлишиб олишди". 

Ушбу ўйиндан сўнг ўтказилган матбуот анжуманида мезбонлар устози Сергей Ковшов ва футболчи Шукурали Пўлатовлар иштирок этишди. Бу ҳақда "Нефтчи" матбуот хизмати хабар бермоқда.

Сергей Ковшов: Бугун жиддий рақибга қарши рақобат олиб бордик. Аммо менга маъқул келган томони “Нефтчи”нинг ғалабага бўлган чанқоқлиги бўлди. Жамоа охиригача курашди. Ғалаба сари интилганликларини кўрсатиб қўйишди. Иштиёқ эса бугунги натижада муҳим роль ўйнади. Ҳамма мураббийлар жамоасининг ғалаба қозонишини истайди. Шу қатори мен ҳам жамоамдан ғалаба кутгандим. Бугун биз оғир меҳнат эвазига қимматли очкони қўлга киритдик. Йигитларнинг ўйинидан кўнглим тўлди.

Шукурали Пўлатов: Бугун Ўзбекистондаги энг кучли клубга қарши тўп сурдик. Буни инкор этиб бўлмайди. Бежизга бу жамоа ўтган мавсумда 2-ўринни қўлга киритмади. Жамоамиз билан ўйинга жиддий тайёргарлик кўргандик. Баҳсда мухлислар бизга жуда катта далда бўлиб туришди. Бунинг учун уларга раҳмат деб қоламан. “Нефтчи” ёмон ўйин кўрсатмади. Бугун раҳбарият томонидан “Насаф”ни мағлуб этиш вазифаси олдимизга қўйилганди. Лекин дуранг натижа ҳам ёмон эмас деб ўйлайман. Жиддий рақибга қарши оғир ўйин кечди.