Ҳусанов бошланиши, ўзбек футболчилари Европани забт этади!

Футбол оламидаги нуфузли манба – The  Athletic нашри Ўзбекистон футбол ассоциацияси техник директори лавозимида ишлаётган бельгиялик мутахассис Гай Киала миллий терма жамоанинг 2026 йилги жаҳон чемпионатига чиқишини таъминлаган ислоҳотлар самараси ҳақидаги маълумотларини эълон қилди.

- Мен сезган нарсалардан бири шуки, илгари ўйинчилар ва мураббийларда ғалаба қозонишга ҳақиқий иштиёқ етишмаслиги эди. Бу ўйин услубимизда ҳам намоён бўларди: ҳаддан зиёд ҳимоявий ўйин, рақиб жамоаларни ўзидан кучли, деб ҳис қилиш, Ўзбекистонни шунчаки жамоа, деб билиш. 

Шунинг учун бу фикрларни ўзгартириш ва кучлироқ прогрессив ўйин услубини тадбиқ қилиш керак бўлди. Ҳозир биз ҳужумкор ва уюшқоқ ўйин намойиш қиладиган бўлдик. Шиоримиз: “Ҳар доим ғалаба қозониш истагимиз ютқазиб қўйиш қўрқувидаг кучлироқ бўлиши шарт”.  Мана шу ғояни сингдира олдик. Йигитларда ўзига бўлган ишонч ошди.

Ўзбекистон футбол борасида ҳали ёш мамлакат эканини унутмаслик керак. Маҳаллий футбол ассоциацияси 1991 йили собиқ иттифоқ парчаланганидан кейин ташкил этилган. Бундан ташқари, Ўзбекистон жуда катта мамлакат: 38 миллион аҳоли, кенг ва бепоён минтақалар, уларнинг кўпи пойтахтдан етарлича олисда. Бу мамлакатдан футбол биринчи рақамли спорт тури. Салоҳият улкан.

Ҳозир Абдуқодир Ҳусанов “Манчестер Сити”да ўйнаяпти. Ҳали Ўзбекистондан яна кўплаб ўйинчилар Европага йўл олади. Чунки бизда талантли футболчилар бисёр.

Узоқ вақт давомида Европа клублари ўз скаутларини Африка ва Жанубий Америкага, шунингдек, Осиёнинг айрим мамлакатларига жўнатганига гувоҳ бўлгансиз. Улар Ўзбекистонни четлаб ўтишар эди. Буларнинг бари ўзгаради. Мен бундан кейин янада кўпроқ ўзбек футболчилари Европага йўл олишига умуман шубҳа қилмайман, - деди Гай Киала The Athletic нашри журналистларига.

Таъкидлаш жоизки, Ўзбекистон миллий терма жамоаси Марказий Осиё мамлакатлари орасидан биринчи бўлиб, футбол бўйича жаҳон чемпионатининг финал қисмида иштирок этадиган бўлди.

Аслида, ўзбек футболи тарбияланувчилари ўсмирлар ва ёшлар ўртасидаги қитъа чемпионатларида мунтазам юқори натижаларни қўлга киритиб, ўз ёш тоифаларида жаҳон чемпионатларида иштирок этиб келаётган эди.

Футбол соҳасида амалга оширилаётган ишлар самарасида муваффақиятларга ҳам босқичма- босқич эришилмоқда. Хусусан, ўтган йили Ўзбекистон U-23 терма жамоаси Осиё кубоги финалида ўйнаб, Париж Олимпиадаси йўлланмасига эга чиққан эди.

Ҳозиргача, футболчиларимиз иштирок этмаган ягона мусобақа – жаҳон чемпионати бўлиб турган эди. Мана энди Ўзбекистон миллий терма жамоасининг азалий орзуси ушалиб, ўзбек футболчилари мундиалда ҳам тўп тепадиган бўлди.

Файзуллаев ўзини "қийнаган" мураббийдан қутилди!

“Манчестер Сити” жаҳон чемпионатига олиб кетмайдиган футболчи номини эълон қилди

Ўзбекистондек мундиалга чиқиш учун футболдан бегона одамларни йўқотиш керак!

Ҳусановнинг “Манчестер Сити”даги келажаги муҳим қарорга боғлиқ?